જામનગરમાં સાંસદ પૂનમબેન માડમ દ્વારા પ્રદર્શન મેદાનમાં છેલ્લા દોઢેક મહીનાથી ક્રિકેટ ટુર્નામેન્ટ ચાલી રહી છે, જામનગરમાં અત્યાર સુધીમાં કયારેય ટીમો ન અવી હોય એટલી ટીમોએ આ ટુર્નામેન્ટમાં ભાગ લીધો છે, ૩૬૪ જેટલી ટીમોએ સાંસદની આ ક્રિકેટ ટુર્નામેન્ટમાં ભાગ લઇને ટુર્નામેન્ટને રસપ્રદ બનાવી છે. આજે સાંજે ૫ વાગ્યાથી સાંસ્કૃતિક કાર્યક્રમ સાથે ફાઇનલ મેચનો પ્રારંભ થનાર છે, એ પહેલા ગઇકાલે પ્રદર્શન મેદાનમાં સાંસ્કૃતિક કાર્યક્રમનું રિહર્સલ પણ કરવામાં આવ્યું હતું, એટલું જ નહીં વડાપ્રધાન નરેન્દ્ર મોદી અને સાંસદ પૂનમબેન માડમના મોટા કટઆઉટ પણ પ્રદર્શન મેદાનમાં રાખવામાં આવ્યા છે, જે આકર્ષણનું કેન્દ્ર બની રહ્યા છે. જામનગર શહેરમાં પ્રદર્શન મેદાનમાં રમાઇ રહેલી આ ટુર્નામેન્ટ આ પહેલા છ દિવસ પહેલા પુરી થનાર હતી પરંતુ ટીમ વધુ હોવાના કારણે આજે આ ટુર્નામેન્ટનો ફાઇનલ મેચ યોજાનાર છે ત્યારે ક્રિકેટ રસીકોમાં પણ ભારે ઉત્સાહનું મોજુ ફરીવળ્યું છે, પ્રદર્શન મેદાનને ચારેકોર શણગારવામાં આવ્યું છે, મોટા-મોટા કટઆઉટની સાથે સુચારુ બેઠક વ્યવસ્થા, વિશાળ સ્ટેજ પણ બનાવવામાં આવ્યું છે, સાંસદ ખેલ મહોત્સવની આ ક્રિકેટ ટુર્નામેન્ટ વર્ષોથી સુધી એક યાદગાર સંભારણું બની રહેશે તેવી જોરદાર તૈયારીઓ કરવામાં આવી છે, આજે મોટી સંખ્યામાં લોકો પ્રદર્શન મેદાનમાં આ ફાઇનલ મેચ જોવા ઉપસ્થિત રહે તેવી શકયતા છે.