પોલીસ કમિશ્નર બ્રજેશકુમાર ઝા, અધિક પોલીસ કમિશનર મહેન્દ્ર બગડીયા, ડીસીપી ઝોન-૧ હેતલ પટેલની સૂચના હેઠળ નશાના દુષ્ણને ડામવા પોલીસ અસરકારક કામગીરી કરી રહી છે. જેના અનુસંધાને ભકિતનગર પોલીસ મથકના પીઆઇએમ.એમ.સરવૈયાની રાહબરી હેઠળ પીએસઆઈ જે.જે.ગોહિલ તથા ટીમ પેટ્રોલિંગમાં હતી. ત્યારે એએસઆઇ હર્ષભાઇ માવદીયાને એવી બાતમી મળી હતી કે, આધારે હુડકો અરવિંદભાઇ મણીયાર સી-કવાર્ટર શેરી નં.૪૬ કવાર્ટર નં.૩૨ જયશ્રીબેન વડગામાના મકાનમાં ભાડેથી રહેતો શખસ ગાંજાનો વેપલો કરે છે.

બાતમીના આધારે ટીમે દરોડો પાડી અફઝલ રજાકમીયા સૈયદ (ઉ.વ.૩૭, રહે. મુળ ધોળીયા હનુમાનજીના મંદિરની બાજુમાં ખીજળા શેરી ધોરાજી) ને ઝડપી લઇ ગાંજાનો જથ્થો ૯૯૯.૬૦૦ ગ્રામ રૂ.૯,૯૬૦ અને મોબાઈલ સહિતનો મુદ્દામાલ કબ્જે કરી આગળની તપાસ આજીડેમ પીઆઇ એ.બી.જાડેજાએ હાથ ધરી હતી.

વધુમાં જાણવા મળતી વિગતો મુજબ, ગાંજા સાથે ઝડપાયેલો શખસ મૂળ ધોરાજીનો વતની છે અને અહીં ભાડાના મકાનમાં રહી મજૂરી કામ કરે છે. તે જૂનાગઢથી ગાંજો લઈ આવી છૂટકમાં વેંચાણ કરવાનો હોવાની પ્રાથમિક કબૂલાત આપી હતી.