શહેરના કેકેવી હોલ પાસે યુવક સાથે અજાણ્યા ફુગ્ગાવાળાએ ઝગડો કરી પડખામાં છરીના બે ઘા મારી દેતા યુવકને લોહી લુહાણ હાલતમાં સિવિલ હોસ્પિટલમાં ખસેડવામાં આવ્યો હતો. યુવકની હાલત ગંભીર હોવાથી પોલીસે અજાણ્યા શખ્સ સામે ગુનો નોંધી તપાસ હાથ ધરી છે.

બનાવની પ્રાપ્ત વિગત મુજબ મૂળ નેપાળનો અને રાજકોટમાં રહી છૂટક મજૂરી કામ કરતો ગોપાલ નવરાજભાઈ સાઉદ (નેપાળી) (ઉ.વ.24)નો ગઈકાલે રાત્રે દશેક વાગ્યે કેકેવી હોલ પાસે હતો ત્યારે કોઈ અજાણ્યા ફુગ્ગા વાળા સાથે ઝગડો થતા યુવકે તેને ધક્કો મારતા શખ્સ નીચે પડી ગયો હતો બાદમાં ઉભો થઈને નેફામાં રહેલી ચાકુ વડે યુવકને પડખાના ભાગે બે ઘા મારી દેતા યુવકે દેકારો મચાવ્યો હતો. આસપાસના લોકો એકઠા થવા લ;લાગતા શખ્સ નાશી છૂટ્યો હતો. યુવકને લોહી લુહાણ હાલતમાં સિવિલ હોસ્પિટલમાં ખસેડવામાં આવતા બનાવ અંગે હોસ્પિટલ ચોકીના સ્ટાફે તાલુકા પોલીસને જાણ કરતા પોલીસે હોસ્પિટલ પહોંચી જરૂરી કાર્યવાહી કરી હતી. યુવક બેભાન હાલતમાં હોવાથી ઝગડો ક્યાં કારણોસર અને કોણે કર્યો એ અંગે પોલીસ વિગતો જાણી શકી નથી, હાલમાં પોલીસે યુવકના ભાઈ ચેતમાન નવરાજભાઇ સાઉદ (રહે.નાના મવા રોડ પેટ્રોલ પંપ પાસે ગાંધી સ્કુલ પાસે)ની ફરિયાદ પરથી અજાણ્યા ફુગ્ગા વાળા સામે ગુનો નોંધી ઝડપી લેવા તજવીજ હાથ ધરી છે.