એઆઈ જે ગતિએ આગળ વધી રહ્યું છે તે પર વિશ્વાસ કરવો મુશ્કેલ છે, પરંતુ શું તમે ક્યારેય કલ્પના કરી છે કે એઆઈ હૃદયની સર્જરી કરી શકે છે? ખરેખર, આ ચીનમાં બન્યું છે, જ્યાં ડોક્ટરોએ એઆઈ સંચાલિત અને અલ્ટ્રાસાઉન્ડ-માર્ગદર્શિત રોબોટનો ઉપયોગ કરીને વિશ્વમાં પ્રથમ વખત ખૂબ જ જટિલ હૃદયની સર્જરી સફળતાપૂર્વક કરી છે. જેમાં એઆઈએ છાતી ચીર્યા વિના જ દર્દીના હૃદયમાં રહેલું કાણું બૂર્યું હતું. વિશ્વમાં પહેલીવાર ચીનમાં એઆઈ દ્વારા કરવામાં આવેલી હૃદયની સર્જરી સફળ બની છે.

આ સર્જરીમાં, રોબોટિક સિસ્ટમે 48 વર્ષીય દર્દીના હૃદયમાં એક જન્મજાત છિદ્રને સર્જિકલ ચીરા વિના સંપૂર્ણપણે બંધ કરી દીધું હતું. રોબોટિક હાથ, એઆઈની બુદ્ધિમત્તા અને ચોક્કસ નેવિગેશન સાથે, આ પ્રક્રિયામાં ખૂબ મદદ કરી હતી.

અહેવાલો અનુસાર, આ ઐતિહાસિક સર્જરી ચીની પીએલએ જનરલ હોસ્પિટલના છઠ્ઠા મેડિકલ સેન્ટરમાં કરવામાં આવી હતી. હોસ્પિટલના કાર્ડિયોલોજીના વરિષ્ઠ વિભાગના નિષ્ણાતોએ આ પ્રક્રિયા કરી હતી.

ડોક્ટરોએ તેમના સત્તાવાર વીચેટ હેન્ડલ પર તેને એક સીમાચિહ્નરૂપ જાહેર કર્યું હતું. આ સર્જરીમાં દર્દીની છાતી ખોલ્યા વિના નસ દ્વારા હૃદયમાં અત્યંત પાતળું અને લવચીક કેથેટર દાખલ કરવામાં આવ્યું હતું. ત્યારબાદ હૃદયના એક ભાગમાં સીલબંધ ઉપકરણ દાખલ કરીને છિદ્રને સુરક્ષિત રીતે બંધ કરવામાં આવ્યું હતું.

આ સર્જરી રોબોટિક હાથનો ઉપયોગ કરીને કરવામાં આવતી સર્જરી કરતા તદ્દન અલગ હતી. રોબોટિક સર્જરીમાં, રોબોટ દર સેકન્ડે રિમોટ કંટ્રોલરનો ઉપયોગ કરીને ડૉક્ટર દ્વારા ચલાવવામાં આવે છે અને રોબોટિક હાથ પોતાની જાતે કોઈ નિર્ણય લઈ શકતો નથી.

ચાઇનીઝ સર્જરીમાં, રોબોટ ડીપ લર્નિંગ અલ્ગોરિધમ પર કામ કરતો હતો. રીઅલ-ટાઇમ ઇમેજ રેકગ્નિશન સીધી રીતે સર્જિકલ હિલચાલ સાથે જોડાયેલું હતું. આનાથી સિસ્ટમ ફક્ત ડૉક્ટરની સૂચનાઓનું પાલન કરીને નહીં, પણ સ્વતંત્ર રીતે નિર્ણયો લેવાની મંજૂરી મળી હતી.

આ સર્જરીમાં એઆઈએ સતત ડોક્ટરોને મદદ કરી હતી. એઆઈ રોબોટિક આર્મ સર્જરી દરમિયાન હૃદયના પેશીઓને આપમેળે સ્કેન કરતો હતો, જેનાથી છિદ્રનો ચોક્કસ નકશો બનતો હતો.
પછી, સબ-મિલિમીટર ચોકસાઈ સાથે, તેણે કેથેટરને આગળ વધાર્યું અને ક્લોઝર ડિવાઇસને યોગ્ય સ્થાને ફીટ કર્યું હતું.

આ એઆઈ રોબોટિક આર્મ ફક્ત અલ્ટ્રાસાઉન્ડ ઇમેજિંગ પર કામ કરે છે, જે રેડિયેશનના જોખમને સંપૂર્ણપણે દૂર કરે છે. હકિકતમાં, આવી નિયમિત સર્જરી દરમિયાન લાઇવ એક્સ-રે જરૂરી છે, જે દર્દીઓ અને સ્ટાફને હાનિકારક રેડિયેશનના સંપર્કમાં લાવે છે. આ એઆઈ સર્જરી આ જોખમને દૂર કરે છે. વધુમાં, આ ટેકનોલોજી નાની હોસ્પિટલોમાં સૌથી જટિલ હૃદય સર્જરી પણ શક્ય બનાવશે.