એઆઈ હવે તબીબી ક્ષેત્રે ડોક્ટરો માટે મદદગાર સાબિત થઈ રહ્યું છે. અમેરિકી સંશોધકો દ્વારા વિકસાવવામાં આવેલ એક નવું એઆઈ ટૂલ માત્ર દર્દીના ચહેરાના એક જ ફોટોગ્રાફનો ઉપયોગ કરીને તે કેટલો બીમાર છે તેની સમીક્ષા કરવામાં મદદ કરી શકે છે. 'ફેસ સર્વાઈવલ' નામના આ એઆઈ મોડેલને લાખો સ્વસ્થ ચહેરાઓ અને કેન્સરના દર્દીઓની ૩૫,૦૦૦ જેટલી તસવીરો પર તાલીમ (ટ્રેનિંગ) આપવામાં આવી છે. આ ટૂલ ખાસ કરીને આંખોની આસપાસના ચહેરાના લક્ષણોનું ઝીણવટપૂર્વક નિરીક્ષણ કરીને દર્દીના જીવિત રહેવાની સંભાવનાનો અંદાજ લગાવી શકે છે. આ માપદંડો વિવિધ પ્રકારના કેન્સર અને તેની અલગ-અલગ ગંભીરતા પર પણ લાગુ પડે છે.સંશોધકોના જણાવ્યા અનુસાર, આ પ્રયોગ અમેરિકા અને નેધરલેન્ડ્સના મોટાભાગના કેન્સરના દર્દીઓ પર કરવામાં આવ્યો હતો, જેમની ઉંમર 50થી 60 વર્ષની વચ્ચે હતી. જોકે, આ સમગ્ર વાસ્તવિક અભ્યાસમાં બાળકોથી લઈને ૯૦ વર્ષથી વધુ ઉંમરના સહભાગીઓને પણ સામેલ કરવામાં આવ્યા હતા. આંખોની આસપાસની ત્વચા અને ચહેરાના સૂક્ષ્મ બદલાવોનું વિશ્લેષણ કરીને એઆઈ દર્દીની શારીરિક સ્થિતિ અને રોગની ગંભીરતાનો ચોક્કસ ખ્યાલ મેળવે છે.બીજી તરફ, અમેરિકાની પ્રખ્યાત હેલ્થ ઓર્ગેનાઈઝેશન માસ જનરલ બ્રિગહમના મુખ્ય સંશોધક ડૉ. રેમંડ મૈક અને તેમના સહયોગીઓ જૈવિક ઉંમર (બાયોલોજિકલ એજ)નો અંદાજ લગાવવા માટે 'ફેસએજ' નામના અન્ય એક એઆઈ ટૂલનું મૂલ્યાંકન કરી રહ્યા છે. આ ટૂલ દ્વારા એ જાણી શકાય છે કે કોઈ વ્યક્તિ પોતાની જન્મ સમયની વાસ્તવિક ક્રમિક ઉંમર (ક્રોનોલોજિકલ એજ)ની તુલનામાં શારીરિક રીતે કેટલો વૃદ્ધ દેખાય છે.કેન્સર અથવા અન્ય ગંભીર બીમારીઓની સારવાર કરતી વખતે તબીબો દર્દીની ઉંમરની સાથે-સાથે તેની શારીરિક ક્ષમતા, જૂની બીમારીઓ, કેન્સરનો પ્રકાર તથા સ્ટેજ, લેબોરેટરી તપાસના રિપોર્ટ અને સારવાર સહન કરવાની ક્ષમતા જેવા અનેક પાસાઓ પર ધ્યાન આપે છે. આ એઆઈ ટૂલ્સ ડૉક્ટરોને ઝડપી નિર્ણય લેવામાં અને દર્દી માટે યોગ્ય સારવાર યોજના ઘડવામાં મહત્વપૂર્ણ સહયોગ પૂરો પાડે છે.