રાજકોટ શહેરમાં ભ્રષ્ટાચાર વિરોધી બ્યુરો (ACB) દ્વારા કડક કાર્યવાહી કરવામાં આવી છે. રાજકોટ શહેરના આજી ડેમ પોલીસ સ્ટેશન હસ્તકની આજી ડેમ પોલીસ ચોકી ખાતે ફરજ બજાવતા એ.એસ.આઈ. અને જીઆરડી જવાનને લાંચ લેતા રંગેહાથ ઝડપી લેવામાં આવ્યા છે. એક જાગૃત નાગરિક દ્વારા એસીબીના ટોલ ફ્રી નંબર ૧૦૬૪ પર કરવામાં આવેલી સચોટ ફરિયાદના આધારે આ સફળ ટ્રેપ પાર પાડવામાં આવી હતી, જેના કારણે પોલીસબેડામાં ભારે ખળભળાટ મચી ગયો છે.

જામીન અને લોકઅપમાં ન રાખવાના બદલામાં માંગી હતી લાંચ

પ્રાપ્ત વિગતો અનુસાર, આ કામના ફરીયાદી વિરુદ્ધ આજી ડેમ પોલીસ સ્ટેશનમાં અગાઉ એક ફરિયાદ દાખલ કરવામાં આવી હતી. આ પ્રકરણની તપાસ આ કેસના આરોપી નંબર (૧) એ.એસ.આઈ. રાજેશભાઈ ઉર્ફે રાજુભાઈ સામતભાઈ મેર (ઉ.વ. ૫૩) કરી રહ્યા હતા. તપાસ દરમિયાન ફરીયાદીને પોલીસ લોકઅપમાં પૂરવામાં નહીં આવે અને જલ્દીથી જામીનની કાર્યવાહી કરી આપવામાં આવશે તેવું કહીને એ.એસ.આઈ. દ્વારા ૧૦,૦૦૦ રૂપિયાની લાંચની માંગણી કરવામાં આવી હતી. આ લાંચની રકમ આરોપી નંબર (૨) મનોજભાઈ બાબુભાઈ ચૌહાણ (ઉ.વ. ૩૧), જેઓ જી.આર.ડી. (GRD) જવાન તરીકે ફરજ બજાવે છે, તેને આપી દેવા માટે સૂચના આપવામાં આવી હતી.

એસીબીનું સફળ છટકું: ટ્રાફિક ભવન કેમ્પસમાંથી આરોપીઓ ઝડપાયા

ફરીયાદી આ ગેરકાયદેસર લાંચની રકમ આપવા માંગતા ન હોવાથી તેમણે ત્વરિત પગલું ભરીને એ.સી.બી.ના ટોલ ફ્રી નંબર પર સંપર્ક સાધીને સમગ્ર મામલે લેખિત/મૌખિક ફરિયાદ નોંધાવી હતી. આ ફરિયાદના આધારે આજરોજ તા. ૨૦ સપ્ટેમ્બર ૨૦૨૬ના રોજ એસીબીની ટીમ દ્વારા લાંચના છટકા (ટ્રેપ)નું આયોજન કરવામાં આવ્યું હતું.

આજી ડેમ પોલીસ ચોકીના ગેટની સામે, ટ્રાફિક ભવન પૂર્વ વિભાગના કેમ્પસમાં રાજકોટ ખાતે આ ગોઠવાયેલા છટકા દરમિયાન આરોપી જી.આર.ડી. જવાન મનોજભાઈ ચૌહાણે ફરીયાદી પાસેથી લાંચની રકમ રૂ. ૧૦,૦૦૦/- પોતાની હાજરીમાં સ્વીકારી લીધી હતી. આ સાથે જ એસીબીની ટીમે સ્થળ પર જ દરોડા પાડીને બંને આરોપીઓને લાંચની રકમ સાથે રંગેહાથ ઝડપી લીધા હતા. એસીબી દ્વારા લાંચની પૂરેપૂરી ૧૦,૦૦૦ રૂપિયાની રકમ પણ સ્થળ પરથી રીકવર કરી લેવામાં આવી છે.