અમદાવાદના પીપળજ વિસ્તારમાં આવેલી ‘હર્ષ એન્ટરપ્રાઈઝ’ નામની ફેક્ટરીમાં આજે ભયાનક આગ ફાટી નીકળી હતી. આગ એટલી પ્રચંડ છે કે ફાયર બ્રિગેડ દ્વારા તાત્કાલિક ધોરણે ‘મેજર કોલ’ જાહેર કરવામાં આવ્યો છે. ઓઈલ અને કેમિકલનો જથ્થો હોવાથી આગ પર કાબૂ મેળવવો ફાયર ફાઈટરો માટે મોટો પડકાર બની રહ્યો છે.

ઘટનાની ગંભીરતા અને ફાયર વિભાગની કામગીરી
સાંજના સમયે ફેક્ટરીમાં અચાનક આગ લાગતા જ અંદર રહેલા મજૂરો અને કર્મચારીઓએ જીવ બચાવવા દોટ મૂકી હતી. આગની તીવ્રતા જોઈને ફાયર વિભાગે યુદ્ધના ધોરણે ઓપરેશન શરૂ કર્યું છે. હાલમાં ઘટનાસ્થળે ફાયર બ્રિગેડની ૭ થી વધુ ગાડીઓ તૈનાત છે. આગ બેકાબૂ હોવાના કારણે શહેરના અન્ય ફાયર સ્ટેશનો પરથી પણ વધારાના ફાઈટર અને વોટર ટેન્કરો મંગાવવામાં આવ્યા છે. આ ફેક્ટરી ઓઈલ અને કેમિકલના ઉત્પાદન સાથે સંકળાયેલી હોવાથી સતત બ્લાસ્ટ જેવો અવાજ સંભળાઈ રહ્યો છે, જે આગને વધુ ભડકાવી રહ્યો છે.

​​​​​​​ધુમાડાના ગોટા કિલોમીટરો સુધી દેખાયા
આગની ભીષણતાનો અંદાજ એ વાત પરથી લગાવી શકાય છે કે પીપળજથી કેટલાય કિલોમીટર દૂર સુધી આકાશમાં કાળા ધુમાડાના ગોટા સ્પષ્ટ જોઈ શકાય છે. આસપાસની અન્ય ફેક્ટરીઓમાં આગ ન પ્રસરે તે માટે સાવચેતીના ભાગરૂપે વીજ પુરવઠો કાપી નાખવામાં આવ્યો છે અને આસપાસનો વિસ્તાર ખાલી કરાવવામાં આવ્યો છે.