સાઉદી અરેબિયાના રિયાધ સ્થિત કિંગ ખાલિદ ઈન્ટરનેશનલ એરપોર્ટ સહિત અનેક મહત્વપૂર્ણ સ્થળો પર હુથી વિદ્રોહીઓ દ્વારા કરવામાં આવેલા ભયાનક હુમલા અને ધમાકા બાદ મધ્ય પૂર્વમાં સુરક્ષા વ્યવસ્થા અત્યંત ગંભીર બની ગઈ છે. આ ભયાનક હુમલાઓને પગલે સાઉદી પ્રશાસન દ્વારા સુરક્ષાના કારણોસર એરપોર્ટને તાત્કાલિક અસરથી બંધ કરવાનો નિર્ણય લેવામાં આવ્યો હતો. આ કટોકટીભરી સ્થિતિને ધ્યાનમાં રાખીને દિલ્હીથી રિયાધ જઈ રહેલી એર ઈન્ડિયાની ફ્લાઈટ (AI2243) ને અરબી સમુદ્ર પરથી જ પરત મોડીને દિલ્હી તરફ રવાના કરવામાં આવી હતી.

મળતી વિગતો અનુસાર એર ઈન્ડિયાની ફ્લાઈટ AI2243 એ દિલ્હી એરપોર્ટ પરથી રિયાધ જવા માટે ટેક-ઓફ કર્યું હતું. આ વિમાન ગુજરાતના હવાઈ ક્ષેત્ર પરથી પસાર થઈને દક્ષિણ તરફ અરબી સમુદ્ર પરથી આગળ વધી રહ્યું હતું. તે જ સમયે સાઉદી અરેબિયાના કિંગ ખાલિદ એરપોર્ટ પર બ્લાસ્ટના સમાચારો મળતાં જ પાયલટોએ ગંભીર સુરક્ષા જોખમ સમજીને વિમાનને હવામાં જ પાછું વાળી લીધું હતું અને વિમાનનું સુરક્ષિત લેન્ડિંગ દિલ્હી ખાતે કરાવવામાં આવ્યું હતું.

સમાચાર એજન્સી પીટીઆઈ (PTI) ના અહેવાલ મુજબ, એર ઈન્ડિયાના ઉચ્ચ અધિકારીઓએ સ્પષ્ટ કર્યું છે કે મુસાફરો અને ક્રૂ સભ્યોની સુરક્ષા તેમની સર્વોચ્ચ પ્રાથમિકતા છે. પરિસ્થિતિની ગંભીરતાને ધ્યાનમાં રાખીને એર ઈન્ડિયા અને એર ઈન્ડિયા એક્સપ્રેસે 10 ઓક્ટોબર સુધી રિયાધથી આવતી અને જતી તમામ એરલાઈન ફ્લાઈટ્સને સંપૂર્ણપણે સસ્પેન્ડ (સ્થગિત) કરી દીધી છે.

સાઉદી અરેબિયામાં ક્ષેત્રીય તણાવ વધી જતાં આંતરરાષ્ટ્રીય હવાઈ માર્ગો અને ફ્લાઈટ ઓપરેશન્સ પર તેની સીધી અસર જોવા મળી રહી છે. એરલાઈન કંપનીઓ દ્વારા રિયાધ જનારા મુસાફરો માટે એડવાઈઝરી જારી કરવામાં આવી છે અને સ્થિતિ સામાન્ય ન થાય ત્યાં સુધી વૈકલ્પિક વ્યવસ્થાઓ પર વિચારણા કરવામાં આવી રહી છે. પ્રશાસન દ્વારા સાઉદી અરેબિયાની સ્થિતિ પર બારીકાઈથી નજર રાખવામાં આવી રહી છે.