હાલમાં એર ઇન્ડિયા દર અઠવાડિયે ઉત્તર અમેરિકા માટે 71 ફ્લાઇટ્સનું સંચાલન કરે છે. આમાંથી 54 ફ્લાઇટ્સ દિલ્હીથી છે. એર ઇન્ડિયાના એમડી અને સીઈઓ કેમ્પબેલ વિલ્સને ગઈકાલે કર્મચારીઓને સંદેશ આપ્યો. તેમણે કહ્યું કે, નેટવર્ક સંબંધિત ઘણા ફેરફારો થયા છે. એરલાઇને છેલ્લા કેટલાક સમયથી યુરોપ અને અમેરિકાના કેટલાક રૂટ બદલ્યા છે. કેટલાક ટેકનિકલ સ્ટોપ્સ પણ ઉમેર્યા. "અમે અન્ય વિકલ્પો ઓળખવામાં સારી પ્રગતિ કરી છે. આથી અમારો ઉદ્દેશ્ય વિદેશમાં ટેકનિકલ સ્ટોપની સંખ્યા ઘટાડવાનો અને ટૂંક સમયમાં વધુ નોન-સ્ટોપ ફ્લાઇટ્સ શરૂ કરવાનો છે તેવું તેઓએ જણાવ્યું હતું.

જમ્મુ અને કાશ્મીરના પહેલગામમાં થયેલા આતંકવાદી હુમલા બાદ ભારતે પાકિસ્તાન સામે બદલો લીધો હતો. આ પછી, પાકિસ્તાને 24 એપ્રિલ, 2025થી ભારતીય એરલાઇન્સને તેના હવાઈ ક્ષેત્રનો ઉપયોગ કરવા પર પ્રતિબંધ મૂક્યો હતો. પાકિસ્તાની હવાઈ ક્ષેત્ર બંધ થવાને કારણે, ભારતીય એરલાઇન્સનો ઉડાનનો સમય વધી ગયો છે. તેમજ ઇંધણનો વપરાશ પણ વધ્યો છે. એરલાઇન્સ પેલોડ અને વિમાનની ઉપલબ્ધતા તેમજ ક્રૂના ફ્લાઇટ ડ્યુટી સમય મર્યાદાઓ સંબંધિત સમસ્યાઓનો સામનો કરી રહી છે. હવે દિલ્હી સહિત ઉત્તર ભારતીય શહેરોથી પશ્ચિમ તરફ જતી બધી ફ્લાઇટ્સ અરબી સમુદ્ર ઉપર વૈકલ્પિક લાંબા રૂટનો ઉપયોગ કરી રહી છે.

હાલમાં, એર ઇન્ડિયા એકમાત્ર ભારતીય એરલાઇન છે જે ઉત્તર અમેરિકા માટે સીધી ફ્લાઇટ્સનું સંચાલન કરે છે. આથી, તે વધુ સમસ્યાઓનો સામનો કરી રહ્યું છે અને ખર્ચ ઘટાડવામાં મદદ કરી શકે તેવા વિવિધ વિકલ્પો શોધી રહ્યું છે. હાલમાં પાકિસ્તાની હવાઈ ક્ષેત્ર બંધ હોવાને કારણે, દિલ્હીથી ઉત્તર અમેરિકા જતી એર ઈન્ડિયાની ફ્લાઇટ્સ લાંબા રૂટનો ઉપયોગ કરી રહી છે. કંપનીને રસ્તામાં કોઈ યુરોપિયન શહેરમાં ટેકનિકલ સ્ટોપ પણ લેવો પડશે. વિમાનમાં ઇંધણ ભરવા માટે ટેકનિકલ સ્ટોપ સામાન્ય રીતે વિયેના (ઓસ્ટ્રિયા) અથવા કોપનહેગન (ડેનમાર્ક)માં હોય છે.

સૂત્રોએ જણાવ્યું હતું કે, એર ઇન્ડિયા દિલ્હીથી ઉત્તર અમેરિકા જતી તેની ફ્લાઇટ્સ માટે ભારતમાં, સંભવતઃ મુંબઈ અથવા અમદાવાદમાં સ્ટોપઓવર રાખવાની શક્યતા પણ ચકાસી રહી છે. જેથી આ ફ્લાઇટ્સને યુરોપના કોઈપણ શહેરમાં રોકાવું ન પડે. સૂત્રોએ જણાવ્યું હતું કે આવી વ્યવસ્થા એરલાઇનને ક્રૂ માટે ઊંચા ઇંધણ વપરાશ, સંચાલન ખર્ચ અને ફ્લાઇટ ડ્યુટી સમય મર્યાદાના પડકારોનો સામનો કરવામાં મદદ કરશે. યુરોપિયન શહેરમાં સ્ટોપઓવરનો અર્થ એ છે કે લેન્ડિંગ ચાર્જ અને ઇંધણ ખર્ચ સહિત વધુ ખર્ચ થાય છે.

ડીજીસીએના નિયમો હેઠળ, ફ્લાઇટ ક્રૂ ફક્ત આઠ કલાક સતત વિમાન ઉડાડી શકે છે. સામાન્ય ફ્લાઇટ સમય લાંબો હોવાને કારણે, ક્રૂ ફ્લાઇટ ડ્યુટી ટાઇમ લિમિટેશન નિયમોનું ઉલ્લંઘન કરશે. આથી, રસ્તામાં ઉતરતી વખતે, એરલાઇન ક્રૂ પાસેથી વધારાના કલાકો કામ કરવાની પરવાનગી માંગી શકે છે. લાંબા અંતર અને અતિ લાંબા અંતરની ફ્લાઇટ્સ (૧૪ કલાકથી વધુ સમયની)ના કિસ્સામાં, એરલાઇન્સ પાસે ક્રૂના બે સેટ હશે.

આ અઠવાડિયાની શરૂઆતમાં, વાણિજ્યિક બાજુ પર વ્યાપક અનુભવ ધરાવતા એરલાઈન ઉદ્યોગના એક અધિકારીએ જણાવ્યું હતું કે ઉત્તર અમેરિકાની 16 કલાકની ફ્લાઇટ માટે વધારાનો સમય લગભગ 1.5 કલાકનો હશે. અધિકારીએ કહ્યું હતું કે, 1.5 કલાક વધારાના માટે, એરપોર્ટ પર ટેકનિકલ સ્ટોપનો ખર્ચ લગભગ 29 લાખ રૂપિયા થશે, જેમાં લેન્ડિંગ અને પાર્કિંગ ચાર્જનો પણ સમાવેશ થાય છે.