હાલમાં બોક્સ ઓફિસ પર ફિલ્મ ‘હનુમાન અંશ’ ની જોરદાર ચર્ચા જોવા મળી રહી છે. માત્ર  રૂ.10 કરોડના બજેટમાં બનેલી આ ફિલ્મ એક પછી એક નવા રેકોર્ડ બનાવી રહી છે. રિપોર્ટ અનુસાર, ફિલ્મે માત્ર 30 દિવસમાં ભારતમાં  રૂ.100 કરોડની કમાણીનો આંકડો પાર કરી લીધો હતો. ફિલ્મે પહેલા દિવસે માત્ર  રૂ.10 લાખની કમાણી સાથે શરૂઆત કરી હતી, પરંતુ ત્યારબાદ તેની કમાણીમાં સતત વધારો જોવા મળ્યો.

‘હનુમાન અંશ’ની સફળતા વચ્ચે હવે વધુ એક ભક્તિ આધારિત ફિલ્મની જાહેરાત કરવામાં આવી છે. ફિલ્મ નિર્માતાઓ હવે બાબા ખાટૂ શ્યામ પર ફિલ્મ બનાવવાની તૈયારી કરી રહ્યા છે.

બાબા ખાટૂ શ્યામ પર બનશે ફિલ્મ

ફિલ્મ ક્રિટિક તરણ આદર્શે સોશિયલ મીડિયા પ્લેટફોર્મ X પર પોસ્ટ કરીને ‘હારે કા સહારા બાબા ખાટૂ શ્યામ હમારા’ પર ફિલ્મ બનવાની માહિતી આપી છે.

રિપોર્ટ અનુસાર, Abundantia Entertainment અને Select Media મળીને બાબા ખાટૂ શ્યામની કથા પર ફિલ્મ બનાવી રહ્યા છે. ફિલ્મનું ટાઇટલ પણ જાહેર કરી દેવામાં આવ્યું છે. ફિલ્મનું નામ ‘હારે કા સહારા બાબા શ્યામ હમારા’ રાખવામાં આવ્યું છે.

સાચી કથા પર આધારિત હશે ફિલ્મ

આ ફિલ્મ શ્રી ખાટૂ શ્યામજીની કથા પર આધારિત હશે. બાબા ખાટૂ શ્યામને તેમના ભક્તો પ્રેમથી શ્યામ બાબા તરીકે પણ ઓળખે છે અને દેશ-વિદેશમાં તેમના લાખો ભક્તો છે.

ફિલ્મમાં ખાટૂ શ્યામજી સાથે જોડાયેલી કથા અને તેમના આશીર્વાદથી અસંખ્ય ભક્તોને મળતા માર્ગદર્શન અને પ્રેરણાને દર્શાવવામાં આવશે.

2027માં સિનેમાઘરોમાં આવશે

બાબા ખાટૂ શ્યામ પર બની રહેલી આ ફિલ્મને 2027માં સિનેમાઘરોમાં રિલીઝ કરવાની જાહેરાત કરવામાં આવી છે. જોકે, ફિલ્મની ચોક્કસ રિલીઝ તારીખ હજુ જાહેર કરવામાં આવી નથી. નિર્માતાઓ આગામી સમયમાં રિલીઝ ડેટની જાહેરાત કરી શકે છે.

ફિલ્મના ડિરેક્ટર, સ્ટાર કાસ્ટ અને પ્રોડક્શન સંબંધિત અન્ય વિગતો પણ ટૂંક સમયમાં જાહેર કરવામાં આવશે.

‘હનુમાન અંશ’ 2026ની 8મી સૌથી વધુ કમાણી કરનારી ફિલ્મ

બીજી તરફ, બાબા નીમ કરોલી સાથે જોડાયેલી કથા પર બનેલી ફિલ્મ  ‘હનુમાન અંશ’ ની કમાણી પણ સતત વધી રહી છે. સેકનિલ્કના આંકડા અનુસાર, ફિલ્મે 31 દિવસમાં ભારતીય બોક્સ ઓફિસ પર આશરે  રૂ.122.13 કરોડનું કલેક્શન કર્યું છે.

આ સાથે ‘હનુમાન અંશ’ 2026ની 8મી સૌથી વધુ કમાણી કરનારી ફિલ્મ બની ગઈ છે. ફિલ્મે ‘કોકટેલ 2’ની  રૂ.104.53 કરોડ અને ‘ઓ રોમિયો’ની  રૂ.83.35 કરોડની કમાણીને પાછળ છોડી દીધી છે. હવે ‘હારે કા સહારા બાબા શ્યામ હમારા’ની જાહેરાત બાદ ભક્તિ આધારિત ફિલ્મોને દર્શકો તરફથી કેવો પ્રતિસાદ મળે છે તે જોવું રસપ્રદ રહેશે.