ઉનાળાની આકરી ગરમી વચ્ચે સામાન્ય જનતા પર મોંઘવારીનો વધુ એક કોરડો ઝીંકાયો છે. દેશની સૌથી મોટી ડેરી સહકારી મંડળી અમૂલ (Amul) દ્વારા દૂધના ભાવમાં પ્રતિ લીટર 2 રૂપિયાનો વધારો કરવાની જાહેરાત કરવામાં આવી છે. આ નવા ભાવ આવતીકાલ સવારથી જ અમલમાં આવશે.

નવા ભાવની વિગતો

અમૂલ દ્વારા લેવામાં આવેલા આ નિર્ણયને કારણે દૂધની તમામ બ્રાન્ડ જેવી કે ગોલ્ડ, શક્તિ, તાઝા અને ગાયના દૂધના ભાવમાં વધારો જોવા મળશે. અમૂલ ગોલ્ડ હવે 500 મિલીના પેકેટ પર એક રૂપિયાનો વધારો થશે. અમૂલ તાઝા અને શક્તિમાં પણ પ્રતિ લીટરે બે રૂપિયાનો સીધો વધારો લાગુ પડશે.

વધારા પાછળનું કારણ

ડેરી સૂત્રોના જણાવ્યા અનુસાર, દૂધના ઉત્પાદન ખર્ચમાં થયેલો સતત વધારો આ નિર્ણય પાછળનું મુખ્ય કારણ છે. પશુ આહારના ભાવમાં થયેલી વૃદ્ધિ, ટ્રાન્સપોર્ટેશન (ડીઝલ-પેટ્રોલ) ના ખર્ચમાં વધારો અને સંચાલન ખર્ચને પહોંચી વળવા માટે કિંમતોમાં વધારો કરવો અનિવાર્ય બન્યો છે. અમૂલનું કહેવું છે કે આ વધારાનો મોટો હિસ્સો સીધો પશુપાલકોના ખિસ્સામાં જશે, જેથી તેઓ દૂધનું ઉત્પાદન ચાલુ રાખવા પ્રોત્સાહિત થાય.

સામાન્ય જનતા પર અસર

મધ્યમ અને ગરીબ વર્ગના પરિવારો માટે દૂધ એ પાયાની જરૂરિયાત છે. ચા-નાસ્તો હોય કે બાળકોનો ખોરાક, દૂધના ભાવ વધતા ઘરના માસિક બજેટ પર સીધી અસર પડશે. અગાઉ શાકભાજી અને ગેસ સિલિન્ડરના ભાવ વધારાથી પરેશાન જનતા માટે આ "મોંઘવારીનો ડામ" સમાન છે.

અમૂલ દૂધના ભાવમાં મે-2025 બાદ અત્યાર સુધી કોઈ વધારો કરવામાં આવ્યો ન હતો. વધારો કરવાનું મુખ્ય કારણ પશુ આહાર, પેકેજિંગ અને બળતણ જેવા ઈનપુટ ખર્ચમાં થયેલો નોંધપાત્ર વધારો છે. અમૂલ તેના સહકારી માળખા દ્વારા ગ્રાહકો પાસેથી મેળવેલા દર 1 રૂપિાયામાંથી 80 પૈસા (80%) સીધા દૂધ ઉત્પાદકોને પરત આપે છે.