રાજકોટ જિલ્લા પંચાતયતના પ્રમુખ તરીકે સંજય પીપળીયા અને ઉપપ્રમુખ તરીકે સાંમત બાંભવાના નામની જાહેરાત

May 24, 2026 05:19 PM

રાજકોટ જિલ્લા ભાજપ દ્વારા રાજકોટ જિલ્લા પંચાયતના પ્રમુખ અને ઉપપ્રમુખના નામોની સત્તાવાર જાહેરાત કરવામાં આવી છે. આ જાહેરાત અંતર્ગત રાજકોટ જિલ્લા પંચાયતના પ્રમુખ તરીકે કુવાડવાના સંજય પીપળીયા, જ્યારે ઉપપ્રમુખ તરીકે સામંત બાંભવાના નામની જાહેરાત કરવામાં આવી છે. ભારતીય જનતા પાર્ટીના મોવડીમંડળ દ્વારા લેવાયેલા આ નિર્ણયને પક્ષના કાર્યકરો અને સ્થાનિક આગેવાનોએ સહર્ષ વધાવી લીધો છે.

નવનિયુક્ત પ્રમુખ સંજય પીપળીયા (કુવાડવા) લાંબા સમયથી સ્થાનિક રાજકારણમાં સક્રિય છે અને સંગઠનમાં મજબૂત પકડ ધરાવે છે. તેમના નેતૃત્વમાં રાજકોટ જિલ્લાના ગ્રામ્ય વિસ્તારોના વિકાસ કાર્યોને વધુ ગતિ મળશે તેવી આશા વ્યક્ત કરવામાં આવી રહી છે. તેમની સાથે ઉપપ્રમુખ તરીકે સામંત બાંભવા પણ પાયાના કાર્યકર તરીકે જાણીતા છે. આ બંને નવનિયુક્ત પદાધિકારીઓની જાહેરાત થતાં જ રાજકોટ જિલ્લા ભાજપ પરિવાર અને સમર્થકોમાં ભારે ઉત્સાહનો માહોલ જોવા મળી રહ્યો છે.

આ જાહેરાત બાદ સોશિયલ મીડિયાથી લઈને પક્ષના કાર્યાલયો સુધી અભિનંદનનો ધોધ વરસી રહ્યો છે. જિલ્લા ભાજપના સંગઠન અને હોદ્દેદારો દ્વારા નવનિયુક્ત પ્રમુખ સંજય પીપળીયા અને ઉપપ્રમુખ સામંત બાંભવાને ઉજ્જવળ કાર્યકાળ માટે હાર્દિક શુભેચ્છાઓ પાઠવવામાં આવી છે. આગામી દિવસોમાં આ નવી ટીમ રાજકોટ જિલ્લાના છેવાડાના માનવી સુધી સરકારી યોજનાઓ પહોંચાડવા અને ગ્રામીણ માળખાકીય સુવિધાઓને વધુ સુદ્રઢ બનાવવા માટે કટિબદ્ધ બનશે તેમ માનવામાં આવી રહ્યું છે.