રવિવારે ગુજરાતના એક અને સૌરાષ્ટ્ર કચ્છના ચાર સેન્ટરોમાં મહત્તમ તાપમાનનો પારો 40 થી 41.7 ડિગ્રી સુધી રહ્યા પછી હવે આજથી ગરમી એ જોર પકડ્યું છે. હવામાન ખાતાના જણાવ્યા મુજબ આગામી એક સપ્તાહ સુધી ગરમીના પ્રમાણમાં ત્રણથી ચાર ડિગ્રી જેટલો વધારો થશે અને મહત્તમ તાપમાનનો પારો 40 થી 43 ડિગ્રી આસપાસ રહેવાની શક્યતા છે.

વેસ્ટર્ન ડિસ્ટર્બન્સની અસરના કારણે અત્યાર સુધી ગરમીના પ્રમાણમાં ઘટાડો નોંધાયો હતો. પરંતુ આ સિસ્ટમની અસર હવે નાબૂદ થતાં આજથી ફરી ગરમીએ જોર પકડ્યું છે. રવિવારે રાજકોટમાં 41.7 અમરેલીમાં 40.9 સુરેન્દ્રનગરમાં 40.8 ભુજમાં 40.2 અને ગાંધીનગરમાં 40.2 ડિગ્રી મહત્તમ તાપમાન નોંધાયું હતું. ભેજનું પ્રમાણ ઘટી ગયું છે. પરંતુ ગુજરાત અને દક્ષિણ ભારતમાં દરિયાકાંઠાના વિસ્તારોમાં ગરમી અને ભેજનું પ્રમાણ વધશે તેવું એલર્ટ હવામાન વિભાગે આપ્યું છે.

આજથી માત્ર ગુજરાતમાં નહીં પરંતુ દેશના અનેક રાજ્યોમાં ગરમીનું પ્રમાણ વધવાની આગાહી કરવામાં આવી છે, ઉત્તર પ્રદેશ મધ્ય પ્રદેશ રાજસ્થાન હરિયાણા અને વિદર્ભમાં હીટ વેવનું એલર્ટ આપવામાં આવ્યું છે. ગુજરાત તમિલનાડુ પુડીચેરી કેરલાના દરિયાકાંઠાના વિસ્તારોમાં ગરમી અને ભેજનું પ્રમાણ વધવા માટે ચેતવણી આપવામાં આવી છે.

હવામાન ખાતાના જણાવ્યા મુજબ નોર્થ ઇસ્ટના મોટાભાગના રાજ્યોમાં આજથી પાંચ દિવસ માટે પ્રતિ કલાકના 30 થી 40 કીલોમીટરની ઝડપે પવન ફુકાશે અને અમુક તબક્કે તેની ઝડપ વધીને 50 કિલોમીટર આસપાસ થવાની શક્યતા છે.

વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી સિસ્ટમના કારણે જમ્મુ કાશ્મીર આસામ અરુણાચલ મેઘાલય કર્ણાટક આંધ્ર પ્રદેશ તમિલનાડુ તેલંગાણા સહિત અનેક રાજ્યોમાં વરસાદ માટે પણ આગાહી કરવામાં આવી છે.