ઓસ્ટ્રેલિયાના રહેવાસી ૩૪ વર્ષીય જેનીટાર ના'આમોઆનાએ એકસાથે ચાર જોડિયા છોકરીઓને જન્મ આપ્યો. ૧૪ જુલાઈના રોજ, ડોકટરોએ સી–સેકશન દ્રારા છોકરીઓને સુરક્ષિત રીતે જન્મ આપ્યો. ગર્ભાવસ્થા ફકત ૭ મહિના અને ૪ દિવસની હતી. ડોકટરોના મતે, આ કોઈ સામાન્ય કિસ્સો નથી. ક્રીના ગર્ભાશયમાં એક જ એગ ચાર ભાગોમાં વહેચાઈ ગયું, જેના પરિણામે આ ચાર છોકરીઓનો જન્મ થયો. આને તબીબી રીતે મોનોઝાયગોટિક કવાડ્રુપ્લેટસ તરીકે ઓળખવામાં આવે છે, જેનો અર્થ એ છે કે જન્મેલી ચારેય છોકરીઓનો ચહેરો એક સરખો જ હોય છે.ડો. એલેકસા બેન્ડલે સમજાવ્યું કે ૧.૫ કરોડ ગર્ભાવસ્થામાં એક મહિલા સાથે આવું થાય છે. સૌથી નોંધપાત્ર વાત એ છે કે આ ચાર છોકરીઓ તેમની માતાના ગર્ભાશયમાં એક જ નાભિ (પ્લેસેન્ટા) દ્રારા જોડાયેલી હતી, જે તબીબી વિજ્ઞાનમાં ભાગ્યે જ જોવા મળે છે.આ ગર્ભાવસ્થા ખૂબ જ જોખમી હતી, તેથી ડોકટરોએ ૨૫મા અઠવાડિયામાં જેનીટારને હોસ્પિટલમાં દાખલ કરી જેથી તેમનું ચોવીસ કલાક નિરીક્ષણ કરી શકાય. તેમના સુરક્ષિત જન્મ પછી, ચાર બહેનોનું નામ એમિલી, હેરિયટ, કેથરિન અને એલેકસા રાખવામાં આવ્યું. ચોથી પુત્રી, એલેકસા, તેમની સારવાર કરનાર મહિલા ડોકટર (ડો. એલેકસા બેન્ડલ) ના નામ પરથી રાખવામાં આવી હતી. હાલમાં, ચારેય છોકરીઓ સારી છે અને તેઓ સંપૂર્ણ રીતે વિકસિત ન થાય ત્યાં સુધી હોસ્પિટલના નર્સરી વોર્ડમાં ઇન્કયુબેટરમાં રાખવામાં આવી છે.જેનીટાર અને તેના પતિ, જોર્થમ, પહેલાથી જ ચાર બાળકો ધરાવે છે, જેની ઉંમર ૧ થી ૧૦ વર્ષની છે. આ ચાર નવી છોકરીઓના આગમન સાથે, તેમના પરિવારમાં હવે કુલ ૧૦ સભ્યો છે, જેમાં આઠ બાળકો અને બે માતાપિતાનો સમાવેશ થાય છે. જેનીટાર કહે છે કે એકસાથે ચાર નવજાત શિશુઓને સંભાળવા તેની કલ્પના કરતાં વધુ મુશ્કેલ છે. હવે, તેની જૂની કાર આટલા મોટા પરિવારને પરિવહન કરવા માટે ખૂબ નાની સાબિત થઈ રહી છે, તેથી જનિતારએ ગોફાઉન્ડમી વેબસાઇટ પર ઓનલાઈન મદદ માંગી છે.