ગુજરાતી સ્ટાર અને દિલ્હી કેપિટલ્સના વર્તમાન કેપ્ટન અક્ષર પટેલે આઈપીએલ 2026માં એક મોટો માઈલસ્ટોન પાર કર્યો છે. સનરાઇઝર્સ હૈદરાબાદ સામે ટોસ કરવા માટે મેદાનમાં ઉતરતાની સાથે જ અક્ષર પટેલે દિલ્હી કેપિટલ્સ તરફથી પોતાની 100મી આઈપીએલ મેચ રમી હતી. દિલ્હીની ફ્રેન્ચાઈઝી માટે આટલી મોટી સંખ્યામાં મેચ રમનારો તે પ્રથમ ઓલરાઉન્ડર ખેલાડી બની ગયો છે.

દિલ્હી કેપિટલ્સ માટે સૌથી વધુ મેચ રમનારા ખેલાડીઓ
દિલ્હીની ટીમ માટે અત્યાર સુધી માત્ર જૂજ ખેલાડીઓ જ લાંબો સમય ટકી શક્યા છે. અક્ષર પહેલા આ યાદીમાં માત્ર રિષભ પંતનું નામ હતું.

રિષભ પંત: 111 મેચ (સૌથી વધુ)
અક્ષર પટેલ: 100 મેચ
અમિત મિશ્રા: 99 મેચ
ડેવિડ વોર્નર: 89 મેચ
શ્રેયસ અય્યર: 87 મેચ

દિલ્હી માટે લાંબા સમય સુધી સેવા આપનાર અમિત મિશ્રા આ યાદીમાં ત્રીજા સ્થાને છે, જ્યારે વિરેન્દ્ર સેહવાગે દિલ્હી માટે 79 મેચ રમી હતી.

ટોસના રાજા પણ બેટિંગમાં સંઘર્ષ
અક્ષર પટેલ માટે આ સીઝન નસીબ અને પ્રદર્શનના મિશ્રણ જેવી રહી છે. એક તરફ તે 'ટોસ' જીતવાના મામલે અજેય રહ્યો છે, તો બીજી તરફ બેટિંગમાં તે રન બનાવવા માટે ઝઝૂમી રહ્યો છે. અક્ષર પટેલ આ સીઝનમાં સતત 6 વખત ટોસ જીતવામાં સફળ રહ્યો છે. તેની સામે હૈદરાબાદના કેપ્ટન ઈશાન કિશન અત્યાર સુધીની સાતેય મેચમાં ટોસ હાર્યા છે. બેટિંગમાં અક્ષરનું પ્રદર્શન ચિંતાજનક રહ્યું છે. તેણે 4 ઇનિંગ્સમાં માત્ર 9.6ની સરેરાશથી 29 રન બનાવ્યા છે.આ ઉપરાંત બોલિંગમાં તેણે અત્યાર સુધીમાં 5 વિકેટ ઝડપીને ટીમ માટે યોગદાન આપ્યું છે.

​​​​​​​અક્ષર પટેલની કપ્તાની હેઠળ દિલ્હી કેપિટલ્સ આ સીઝનમાં નવા સમીકરણો શોધી રહી છે. ભલે બેટથી તેનું પ્રદર્શન અત્યારે નબળું હોય, પરંતુ 100 મેચોનો અનુભવ અને તેની ઓલરાઉન્ડર ક્ષમતા પર ટીમને હજુ પણ પૂરો ભરોસો છે. દિલ્હીના ચાહકો આશા રાખી રહ્યા છે કે આ ઐતિહાસિક મેચ બાદ અક્ષર બેટ અને બોલ બંનેથી પોતાની જૂની લય પાછી મેળવશે.