ભારતીય જનતા પાર્ટી દ્વારા તાજેતરમાં ચૂંટણી પંચને સુપરત કરાયેલા વાર્ષિક ઓડિટ રિપોર્ટ મુજબ, પાર્ટી પાસે આશરે 10,000 કરોડ રૂપિયા રોકડ અને થાપણો છે. 2024-25માં, દિલ્હીમાં આમ આદમી પાર્ટી અને ઓડિશામાં બીજુ જનતા દળને સત્તા પરથી દૂર કર્યા પછી પાર્ટીનો ચૂંટણી પ્રચાર ખર્ચ લગભગ બમણો થઈ ગયો. ખર્ચ પાછલા વર્ષના 1,754.06 કરોડથી વધીને 3,335.36 કરોડ રૂપિયા થયો હોવાનું સામે આવ્યું છે.

રિપોર્ટમાં જણાવાયું છે કે 2024-25માં ભાજપના ખાતાઓમાં 2,882.32 કરોડ રૂપિયાનો ચોખ્ખો વધારો થયો હતો. ૩૧ માર્ચ, ૨૦૨૫ ના રોજ પૂરા થતા નાણાકીય વર્ષમાં પાર્ટીનું જનરલ ફંડ ૧૨,૧૬૪ કરોડ રૂપિયા પર પહોંચી ગયું છે, જે ગયા વર્ષે ₹૯,૧૬૯ કરોડ હતું. મંગળવારે ભાજપના નવા પ્રમુખ તરીકે ચૂંટાયેલા નીતિન નબીનને હવે આ રકમનો ઉપયોગ કરવાનો અધિકાર રહેશે.

ભાજપનો ચૂંટણી ખર્ચ કુલ ખર્ચના ૮૮.૩૬%

૨૦૨૪-૨૫માં, ભાજપને ૬,૧૨૫ કરોડ રૂપિયાદાનમાં મળ્યા હતા, જે પાછલા વર્ષના ૩,૯૬૭ કરોડ રૂપિયા હતા. અહેવાલ મુજબ, પાર્ટી પાસે રૂ.૯,૩૯૦ કરોડની ફિક્સ ડિપોઝિટ છે અને ૨૦૨૪-૨૫માં બેંકો પાસેથી ૬૩૪ કરોડ રૂપિયાનું વ્યાજ મળ્યું છે. ભાજપે ૨૦૨૪-૨૫માં રૂ.૬૫.૯૨ કરોડનું આવકવેરા રિફંડ ફાઇલ કર્યું હતું અને તેના પર રૂ.૪.૪૦ કરોડનું વ્યાજ મેળવ્યું હતું. ૨૦૨૪-૨૫માં પાર્ટીનો ચૂંટણી ખર્ચ તેના કુલ ખર્ચના ૮૮.૩૬ ટકા હતો.

આ અહેવાલ મુજબ, 2024-25માં ચૂંટણીઓ પર કુલ ખર્ચ રૂ.3,335.36 કરોડ હતો, જેમાંથી રૂ.312.9 કરોડ ઉમેદવારોને નાણાકીય સહાય પૂરી પાડવા પાછળ ખર્ચવામાં આવ્યા હતા, અને રૂ.583 કરોડ હવાઈ અને હેલિકોપ્ટર મુસાફરી પાછળ ખર્ચવામાં આવ્યા હતા.ચૂંટણી પ્રચાર માટે, રૂ.1,125 કરોડ ઇલેક્ટ્રોનિક મીડિયા પર, રૂ107 કરોડ કટઆઉટ, હોર્ડિંગ્સ અને બેનરો પર ખર્ચવામાં આવ્યા હતા. વધુમાં, રૂ.897 કરોડ જાહેરાતો પર, ₹90.93 કરોડ રેલીઓ અને પ્રચાર પર અને રૂ.51.72 કરોડ સભાઓ પર ખર્ચવામાં આવ્યા હતા.