આ અંગેની હકીકત મુજબ, તા.૧૪/૦૫/૨૦૨૬ના રોજ રાજકોટ એસ.ઓ.જી. શાખા દ્વારા બાતમીના આધારે ગોંડલ હાઇવે ઉપર ભરૂડી ટોલનાકા પાસે આવેલ નિલકંઠ કોમ્પ્લેક્ષના આગળના ભાગે જાહેર રોડ ઉપર ફોર્ચ્યુનર કાર નં. 06- DQ-1566માં કિરણ ચિમનભાઈ પટેલને તેની કારમાં નશાકારક ટેબ્લેટની ૧૫ સ્ટ્રિપ અને શરાબની ૫૧ બોટલ સાથે ઝડપી લેવાયો હતો. જે સ્ટ્રિપ અંગે પુછતા આરોપી પાસે કોઈ લાઈસન્સ કે પરમિટ ન હોય કે ડોકટરનું લખાણ ન હોય જેથી તપાસનીશ અધિકારી દ્વારા નશાકારક ટેબ્લેટ તેમજ ૫૧ નંગ દારૂની બોટલો તેમજ ફોર્ચ્યુનર કાર વગેરે 7.50 લાખનો મુદ્દામાલ કબ્જે કરી આરોપી વિરુધ્ધ ગોંડલ તાલુકા પો.સ્ટે.માં એનડીપીએસ એકટ-૮ (સી), ૨૧ (બી), ૨૯ મુજબ તેમજ પ્રોહિબિશનનો ગુનો નોંધી આરોપીની ધરપકડ કરવામાં આવી હતી. ધોરણસરની કાર્યવાહી બાદ જેલહવાલે થયો હતો. ત્યારબાદ આરોપી દ્વારા રેગ્યુલર જામીન ઉપર છોડવા સેશન્સ અદાલતમાં જામીન અરજી કરવામાં આવી હતી. સદરહું અરજી સુનાવણી ઉપર આવતા બચાવપક્ષે રોકાયેલ એડવોકેટ વિજયરાજસિંહ સુધીરસિંહ જાડેજા દ્વારા એવી રજુઆત કરવામાં આવેલ કે, કબ્જે કરેલ કહેવાતો માદક પદાર્થ એન.ડી.પી.એસ. ચાર્ટ જોતા ઈન્ટરમીડીયેટ કવોન્ટિટીમાં આવે છે. તેથી એન.ડી.પી.એસ. એકટની કલમ-૩૭નો બાધ નડતો નથી, તેમજ હાલ તપાસ પૂર્ણ થઈ ગયેલ છે. આરોપી વિરુધ્ધ અગાઉ આવા કોઈ એન.ડી.પી.એસ.ના ગુના નોંધાયેલ નથી. અટક કરતી વખતે પોલીસ દ્વારા ગ્રાઉન્ડ્સ ઓફ એરેસ્ટ અને રીઝન્સ ઓફ એરેસ્ટ આપવામાં આવેલ નથી. જેથી કસ્ટડી ઇલીગલ ગણાય, જે અંગેના ઉચ્ચ અદાલતના માર્ગદર્શક ચુકાદાઓ ઉપર ધ્યાન દોરતા સેશન્સ કોર્ટ દ્વારા બચાવપક્ષની દલીલ ગ્રાહ્ય રાખી આરોપીને શરતી જામીન ઉપર મુકત કરવાનો હુકમ કરવામાં આવેલ છે. આ કામમાં આરોપી વતી ગોંડલના એડવોકેટ વિજયરાજસિંહ સુધીરસિંહ જાડેજા રોકાયા હતા.