બેલ્જિયમની ફ્લેમિશ સંસદના સભ્ય અને વ્લામ્સ બેલાંગ પાર્ટીના વરિષ્ઠ નેતા ફિલિપ ડેવિન્ટરે ખુલ્લે આમ પાકિસ્તાનને આતંકવાદી રાજ્ય ગણાવ્યું છે. ડેવિન્ટર હાલમાં ગ્લોબલ પેટ્રિઓટ્સ મીટ 2025 માં ભાગ લેવા માટે નવી દિલ્હીમાં છે. તેમણે સમગ્ર યુરોપમાં પાકિસ્તાન પર સંપૂર્ણ પ્રતિબંધ મૂકવાની પણ હાકલ કરી હતી. તેમણે જણાવ્યું હતું કે પાકિસ્તાન આતંકવાદી સંગઠનોને પૈસા, શસ્ત્રો અને તમામ પ્રકારની સુવિધાઓ પૂરી પાડે છે. ડેવિન્ટરે કહ્યું, ભારત અને પશ્ચિમી દેશો એક જ ખતરાનો સામનો કરી રહ્યા છે કટ્ટરપંથી ઇસ્લામિક આતંકવાદ.

ડેવિન્ટરે કહ્યું આપણો એક જ દુશ્મન છે. પાકિસ્તાન આ કટ્ટરપંથી જેહાદી ચળવળો અને આતંકવાદી જૂથોને પૈસા, લોજિસ્ટિક્સ અને તમામ પ્રકારની સુવિધાઓથી સમર્થન આપે છે. થોડા અઠવાડિયા પહેલા દિલ્હીમાં થયેલા હુમલાઓ આનો પુરાવો છે. આપણા દેશમાં પણ આવું જ થાય છે. તેથી, પાકિસ્તાન એક આતંકવાદી દેશ છે અને યુરોપે તેના પર સંપૂર્ણપણે પ્રતિબંધ મૂકવો જોઈએ. ફિલિપ ડેવિન્ટર બેલ્જિયમના જમણેરી અને ફ્લેમિશ રાષ્ટ્રવાદી પક્ષ, વ્લામ્સ બેલાંગના અગ્રણી નેતા છે.

ગ્લોબલ પેટ્રિઓટ્સ મીટ 2025 દિલ્હીના ઇન્ડિયા ઇન્ટરનેશનલ સેન્ટર ખાતે યોજાઈ રહી છે. આ કોન્ફરન્સમાં વિશ્વભરના રાષ્ટ્રવાદી પક્ષોના નેતાઓ, વિચારકો અને સંસદસભ્યો ભાગ લઈ રહ્યા છે. તેનો ઉદ્દેશ્ય વિશ્વને ભારતના લાંબા સમયથી ચાલી રહેલા આતંકવાદ વિરોધી સંઘર્ષ અને રાષ્ટ્ર પ્રથમ નીતિમાંથી શીખવામાં મદદ કરવાનો છે. કોન્ફરન્સના ઉદ્દેશ્ય અંગે, ડેવિન્ટરે કહ્યું, તેનો પ્રાથમિક ઉદ્દેશ્ય વિશ્વભરના દેશભક્ત પક્ષો વચ્ચે સહયોગ વધારવાનો છે. ભારતમાં શાસક ભારતીય જનતા પાર્ટી આ ક્ષેત્રમાં સૌથી મોટી શક્તિ છે. અમે વિચારોનું આદાન-પ્રદાન કરી રહ્યા છીએ અને સહકારના નવા માર્ગો શોધી રહ્યા છીએ.