દેશ બહાર વિદેશમાં રહીને કમાણી કરતા અનિવાસી ભારતીયો (NRI) માટે દેશના બે સૌથી મોટા પ્રાઇવેટ બેંકો તરફથી ખુશખબર આવી છે. HDFC બેંક અને ICICI બેંકે એનઆરઆઈ માટેની ફોરેન કરન્સી નોન-રેસિડન્ટ એટલે કે FCNR (Foreign Currency Non-Resident) ફિક્સ્ડ ડિપોઝિટ (FD) પરના વ્યાજદરોમાં વધારો કર્યો છે. હવે એનઆરઆઈ ગ્રાહકો પોતાની વિદેશી કમાણી ડોલરમાં જમા રાખીને એક્સચેન્જ રેટના જોખમ વગર અને કોઈપણ ટેક્સ ચૂકવ્યા વગર (Tax-free) વધુ રિટર્ન મેળવી શકશે. વ્યાજદરમાં કરાયેલા આ વધારા અને નવા વ્યાજદરો અંગેનો સંપૂર્ણ વિગતવાર અહેવાલ નીચે મુજબ છે.

બેંકો દ્વારા વ્યાજદરમાં આ વધારો કરવા પાછળ રિઝર્વ બેંક ઓફ ઈન્ડિયા (RBI) ની નીતિઓ મુખ્ય કારણ છે. આરબીઆઈ દ્વારા નક્કી કરવામાં આવ્યું હતું કે ૩ થી ૫ વર્ષની મુદતવાળી ફોરેન કરન્સી એફડી પર થતો 'હેજિંગ કોસ્ટ' (ચલણના ઉતાર-ચઢાવનો ખર્ચ) ચાલુ વર્ષના ૩૦ સપ્ટેમ્બર સુધી સરકાર વહન કરશે. બેંકોનો આ ખર્ચ બચી જતાં તેમણે તેનો સીધો ફાયદો ગ્રાહકો સુધી પહોંચાડતા વ્યાજદરોમાં ૦.૨૫% સુધીનો વધારો કર્યો છે.

HDFC બેંકના નવા દરો અને મર્યાદાઓ
HDFC બેંકે ૧ ઓગસ્ટ ૨૦૨૬ થી પોતાના નવા દરો અમલી બનાવી દીધા છે:

૩ થી ૫ વર્ષની એફડી: આ મુદત માટે સૌથી વધુ ૬.૨૫% નો વાર્ષિક વ્યાજદર મળશે.

ટૂંકી મુદતની એફડી: ૧ થી ૨ વર્ષ માટે ૩.૫૦% અને ૨ થી ૩ વર્ષ માટે ૩.૨૫% વ્યાજ નક્કી કરાયું છે.

લોક-ઈન પિરિયડ: ૧૦ જૂન થી ૩૦ સપ્ટેમ્બર ૨૦૨૬ વચ્ચે ૩ થી ૫ વર્ષ માટે ખોલવામાં આવનાર એફડી પર ૧ વર્ષનો લોક-ઈન પિરિયડ લાગુ રહેશે, એટલે કે એક વર્ષ સુધી પૈસા ઉપાડી શકાશે નહીં.

પ્રોસેસિંગ સમય: જો નેટબેંકિંગ દ્વારા એફડી બુક કરવામાં આવે તો તેને ચાલુ થવામાં બે વર્કિંગ ડે નો સમય લાગી શકે છે.

ICICI બેંકના નવા દરો અને ડિપોઝિટ શરતો
ICICI બેંકે પણ ૩ ઓગસ્ટ ૨૦૨૬ થી પોતાના દરો સુધારી લીધા છે:

૩ થી ૫ વર્ષની એફડી: જો ડિપોઝિટની રકમ ૪ લાખ ડોલર કે તેથી વધુ હશે તો ૬.૨૫% વ્યાજ મળશે. પરંતુ જો રકમ ૪ લાખ ડોલરથી ઓછી હશે તો ૬.૦૦% ના દરે રિટર્ન આપવામાં આવશે.

૧ થી ૩ વર્ષની એફડી: આ મુદત માટે બેંક ૩.૮૫% નું વ્યાજ આપી રહી છે.

સમય પહેલા પૈસા ઉપાડવા અંગેના કડક નિયમો
ICICI બેંકે સમય પહેલાં ડિપોઝિટ વિથડ્રો કરવા અંગે સ્પષ્ટતા કરી છે:

૧. ૧ થી ૩ વર્ષની એફડી: ૧૨ મહિના પૂરા થયા અગાઉ જ જો પૈસા ઉપાડવામાં આવશે તો કોઈ જ વ્યાજ મળશે નહીં. પરંતુ ૧૨ મહિના પછી પૈસા ઉપાડવા પર નક્કી થયેલું વ્યાજ મળશે અને કોઈ પેનલ્ટી લાગશે નહીં.

​​​​​​​૨. ૩ થી ૫ વર્ષની એફડી: આમાં ૧ વર્ષનો લોક-ઈન પિરિયડ ફરજિયાત છે. એક વર્ષ પૂરું થયા પછી જો એફડી અકાળે તોડવામાં આવે, તો બેંક ૧% પેનલ્ટી (દંડ) કાપશે અને બાકી રહેલા સમયગાળા મુજબ વ્યાજની ચૂકવણી કરશે.