સારવારમાં દમ તોડયો: ચાંપા બેરાજામાં વિજપોલ તુટી પડતા ઘવાયેલા મજુરનું મૃત્યુ

દરેડ જીઆઇડીસીમાં મારુતી મેટલ નામના કારખાનાની પિતળની ભઠ્ઠીમાં ગત મહિનામાં અચાનક બ્લાસ્ટ થતા શરીરે દાઝી ગયેલા બિહારી મજુરનું રાજકોટની હોસ્પીટલમાં સારવાર દરમ્યાન મૃત્યુ થયું છે જયારે ચાંપા બેરાજા ગામે ઇલેકટ્રીક પોલ પર વાયર બાંધવા જતા અચાનક થાંભલો નીચે પડી જતા યુવાનનું ઇજા સબબ સારવારમાં મૃત્યુ થયું છે.
મુળ બિહારના ફખરપુર ગામના વતની અને દરેડ મસીતીયા રોડ પર રહેતા વિશુનાથ મહેન્દ્રભાઇ શર્મા (ઉ.વ.૩૦) નામનો યુવાન ગત તા. ૨૬-૨-૨૪ બપોરના સુમારે દરેડ જીઆઇડીસીમાં મારુતી મેટલ નામના કારખાનાની પિતળની ભઠ્ઠીમાં કામ કરતા હતા જેમાં કોઇપણ રીતે અચાનક બલાસ્ટ થતા વિશુનાથભાઇ શરીરે દાઝી જતા પ્રથમ જી.જી. હોસ્પીટલ ખાતે સારવારમાં ખસેડાયા હતા.
ત્યારબાદ વધુ સારવાર માટે રાજકોટ ખાનગી હોસ્પીટલ ખાતે દાખલ કરવામાં આવ્યા હતા જયાં સારવાર દરમ્યાન તેમનું મૃત્યુ નિપજયુ છે આ અંગે દરેડ વિસ્તારમાં રહેતા હિતેશકુમાર મહેન્દ્ર શર્માએ ગઇકાલે પંચ-બીમાં જાણ કરી હતી જેના આધારે પોલીસે આગળની કાર્યવાહી હાથ ધરી છે.
બીજા બનાવમાં રાજસ્થાનના અલવર જીલ્લાના કઠુમર તાલુકાના ખકાવાલ્યનના વતની યોગેશ બચુરામભાઇ સેન (ઉ.વ.૨૩) નામનો મજુર યુવાન ગત તા. ૧-૨-૨૪ના રોજ જામનગર તાબેના ચાંપા બેરાજા ગામે પંચાયત સામે પોલ પર વાયર બાંધવા જતા પોલ તુટીને નીચે પટકાતા શરીરે ઇજાઓ થઇ હતી દરમ્યાન સારવારમાં મૃત્યુ થયું છે આ અંગે હીરાલાલ બચુરામ સેન દ્વારા પંચ-બીમાં જાણ કરાઇ હતી.