સેન્ટ્રલ બોર્ડ ઓફ સેકન્ડરી એજ્યુકેશન દ્વારા સીબીએસઇ ધોરણ 12માનું પરિણામ જાહેર કરવામાં આવ્યું છે. વિદ્યાર્થીઓ સીબીએસઇની સત્તાવાર વેબસાઇટ, ડિજિલોકર પોર્ટલ અને ઉમંગ એપ પરથી તેમનું 12માનું પરિણામ ચકાસી શકે છે. વિદ્યાર્થીઓ પોતાનો રોલ નંબર અને એડમિટ કાર્ડ આઇડી દાખલ કરીને પોતાનું પરિણામ ચકાસી શકે છે. આ વર્ષે, સીબીએસઇ 12માનું પરિણામ 85.20 ટકા આવ્યું છે. 

આ વર્ષે કમ્પાર્ટમેન્ટ કેટેગરીમાં ૧,૬૩,૮૦૦ વિદ્યાર્થીઓ સ્થાન પામ્યા છે. 94,028 વિદ્યાર્થીઓએ 90 ટકા અને તેથી વધુ ગુણ મેળવ્યા છે, જ્યારે 17,113 વિદ્યાર્થીઓએ 95 ટકાથી વધુ ગુણ મેળવ્યા છે. કેન્દ્રીય વિદ્યાલયોએ 98.55 ટકા વિદ્યાર્થીઓ પાસ સાથે શ્રેષ્ઠ પ્રદર્શન કર્યું છે, ત્યારબાદ જવાહર નવોદય વિદ્યાલયો 98.47 ટકા વિદ્યાર્થીઓ પાસ સાથે બીજા ક્રમે રહ્યા છે. 

ત્રિવેન્દ્રમ પ્રદેશનું સીબીએસઇ 12માનું પરિણામ દેશમાં શ્રેષ્ઠ રહ્યું છે. ત્રિવેન્દ્રમ પ્રદેશ 95.62 ટકા પાસ ટકાવારી સાથે યાદીમાં ટોચ પર રહ્યું છે, ત્યારબાદ ચેન્નાઈ 93.84 ટકા અને બેંગલુરુ 93.19 ટકા સાથે બીજા અને ત્રીજા ક્રમે છે. જ્યારે પ્રયાગરાજનું પરિણામ સૌથી ઓછું રહ્યું છે. દેશભરમાં લગભગ ૧૮.૫ લાખ વિદ્યાર્થીઓએ પરીક્ષા આપી હતી. 

આ વર્ષે પણ છોકરીઓએ છોકરાઓ કરતાં સારું પ્રદર્શન કર્યું છે. છોકરીઓની પાસ ટકાવારી 88.86 ટકા જ્યારે છોકરાઓની 82.13 ટકા પાસ ટકાવારી છે. બંને વચ્ચે 6.73 ટકાનો તફાવત છે. ટ્રાન્સજેન્ડર કેટેગરીના વિદ્યાર્થીઓની પાસ ટકાવારી 100 ટકા છે. છેલ્લા બે વર્ષથી સીબીએસઇ 13 મેના રોજ ધોરણ 10 અને 12ના પરિણામો જાહેર કરી રહ્યું છે. આ વર્ષે, બોર્ડે ૧૩ મેના રોજ પરિણામ પણ જાહેર કર્યું છે. સીબીએસઇ ધોરણ ૧૦ની પરીક્ષા વર્ષમાં બે વાર લેવામાં આવતી હોવાથી, પરિણામો લગભગ એક મહિના વહેલા, ૧૫ એપ્રિલના રોજ જાહેર કરવામાં આવ્યા હતા.

સીબીએસઇ ધો. 12ની પૂરક પરીક્ષા 15 જુલાઈ, 2026ના રોજ એક જ દિવસ માટે યોજાશે. કમ્પાર્ટમેન્ટલ વિદ્યાર્થીઓ અથવા જેઓ એક જ વિષયમાં પોતાના સ્કોર સુધારવા માંગે છે તેઓ આ પરીક્ષા આપી શકે છે. એલઓસી (ઉમેદવારોની યાદી) સબમિશન પ્રક્રિયા 2 જૂન, 2026ના રોજ ઓનલાઈન શરૂ થશે.