જામનગર સહિત સમગ્ર હાલારમાં મિશ્ર ઋતુનો બેવડો માર પડયો છે. છેલ્લા અઠવાડિયાથી બપોરના અસહ્ય ગરમીની શરૂઆત થઇ ચુકી છે. ત્યારે સવાર સાંજ હજુ પણ ઠંડીનો માહોલ રહ્યા કરે છે. એક તરફ મચ્છરનો ત્રાસ બીજી તરફ રોગચાળાએ માઝા મુકી છે ત્યારે મહતમ તાપમાનમાં બે ડીગ્રીનો વધારો થયો છે અને તાપમાન ૩૧ ડીગ્રીએ પહોંચ્યુ છે. આવનારા દિવસોમાં વધુ ગરમી પડશે તેવા ભણકારા વાગી રહ્યા છે ત્યારે રાજયમાં રાજકોટ, અમરેલી અને સુરતમાં પણ તાપમાન ૩૫ ડીગ્રીએ પહોંચી ગયુ છે. 


કલેકટર કચેરીનાં કંટ્રોલરૂમના જણાવ્યા મુજબ મહતમ તાપમાન ૩૧ ડીગ્રી, લઘુતમ તાપમાન ૨૦ ડીગ્રી, હવામાં ભેજ ૫૯ ટકા, અને પવનની ઝડપ ૧૦ થી ૧૫ પ્રતિકલાક જોવા મળી હતી. આ ઉપરાંત ગામડાઓમાં અને તાલુકા મથકો કાલાવડ, ખંભાળીયા, દ્વારકા, કલ્યાણપુર, જામજોધપુર, લાલપુર, ધ્રોલ, જોડીયા, ભાટીયા, રાવલ, ફલા સહિતનાં ગામડાઓમાં પણ બપોરે ગરમી શરૂ થતાં ખેતરમાં કામ કરતા ખેડુતો પણ ગરમીમાં કામ કરવાથી મુશ્કેલી અનુભવી રહ્યા છે. 


છેલ્લા કેટલાક સમયથી હવામાનમાં પલટો આવી રહ્યો છે. જામનગર સહિત સમગ્ર સૌરાષ્ટ્ર કચ્છમાં ઠંડી ગરમીનો માહોલ જોવા મળે છે. ગઇકાલે તો સુરત, અંકલેશ્ર્વર, ગોધરા અને પંચમહાલ જિલ્લામાં માવઠુ થયુ હતું. હાસોઠ ગામમાં એકાદો ઇંચ વરસાદ પડયો હતો. ત્યારે જામનગરનું તાપમાન પણ વધી ગયું હતું.