અકસ્માતના આ બનાવની જાણવા મળતી વિગતો મુજબ, મૂળ મધ્યપ્રદેશના જાંબુવા જિલ્લાના કાળીદેવી તાલુકાના ધાવલીયા ગામના વતની અને હાલ કોટડા સાંગાણી તાલુકાના નારણકા ગામ પાસે આવેલા ઓરબીસના કારખાનામાં મજૂરીકામ કરનાર રવિન્દ્રભાઇ બાલુભાઇ મોહનિયા(ઉ.વ.૨૮) નામના આદિવાસી યુવાને અકસ્માતની ઘટના અંગે નોંધાવેલી ફરિયાદમાં જણાવ્યું હતું કે, તેમને સંતાનમાં ત્રણ પુત્રો છે.

તા.૬/૧૧ ના બપોરના સમયે યુવાન અહીં કારખાના પાસે બાળકોને સેગ્રીકેશન અરિયામાં રમાડતો હતો અને તેની પત્ની બાજુના કારખાનામાં કામ કરતી હતી. દરમિયાન તેમનો પુત્ર મીઠુ(ઉ.વ. ૩.૫) એકલો રમતો હતો ત્યારે અહીં કારખાનામાં માલ સામાનની હેરફેર માટેના વાહને તેને ઠોકરે લેતા બાળક ગંભીર રીતે ઘવાયો હતો. અકસ્માતની આ ઘટનાને લઇ સુપરવાઇઝર વિશાલભાઇ તથા આશિષભાઇ આવી ગયા હતાં. બાદમાં બાળકને સારવાર માટે ખાનગી હોસ્પિટલ લઇ ગયા હતાં. અહીં સારવાર દરમિયાન આ માસુમે આંખો મીંચી દીધી હતી. વાહલાસોયા પુત્રનું અકસ્માતમાં મોત થતા દંપતી આઘાતમાં સરી પડયું હતું. બનાવ અંગે બાળકના પિતાની ફરિયાદ પરથી કોટડા સાંગાણી પોલીસે અકસ્માત સર્જનાર વાહનચાલક સામે ગુનો નોંધી જરૂરી કાર્યવાહી કરી હતી