સિગારેટ પીવી સ્વાસ્થ્ય માટે અત્યંત હાનિકારક હોવા છતાં, તેને પીનારાઓની કોઈ અછત નથી. આ સિગારેટ શોખીનોને ટૂંક સમયમાં મોટો ઝટકો લાગશે, કારણ કે એક ફેબ્રુઆરી, 2026થી સિગારેટ, બીડી અને પાન મસાલા જેવા તમાકુ ઉત્પાદનો પર વધારાની એક્સાઇઝ ડ્યુટી લાદવાના સરકારના નિર્ણયથી ઘણી મોટી બ્રાન્ડની સિગારેટ મોંઘી થશે. આમાં ગોલ્ડ ફ્લેક, ક્લાસિક અને ક્લાસિક કનેક્ટનો સમાવેશ થાય છે.

આવનારા સમયમાં આ કિંમતોમાં 19-41 ટકાનો વધારો થઈ શકે છે. નવી શિપમેન્ટ આવ્યા પછી છૂટક બજારમાં સિગારેટના ભાવમાં વધારો થવાની સંભાવના છે. અહેવાલો એ પણ સૂચવે છે કે કેટલાક દુકાનદારોએ પહેલાથી જ હાલના સ્ટોકને ઊંચા દરે વેચવાનું શરૂ કરી દીધું છે. એક અહેવાલ મુજબ, પ્રીમિયમ સેગમેન્ટમાં સિગારેટના ભાવમાં નોંધપાત્ર વધારો જોવા મળી રહ્યો છે. જેમાં ગોલ્ડ ફ્લેક સિગારેટના દસ પેકની કિંમત હવે રૂ.240 છે, જે પહેલા રૂ.170 હતી. તેવી જ રીતે 20-પીસ ક્લાસિક પેકની કિંમત હવે રૂ.480 થશે, જે રૂ.340 હતી. ગોલ્ડ ફ્લેક સુપરસ્ટાર વેલ્યુ પેક, જે પહેલા રૂ.59માં વેચાતું હતું, તે હવે રૂ.70 માં વેચાશે.

દેશમાં સિગારેટના ભાવ સૌપ્રથમ ત્યારે વધ્યા જ્યારે જીએસટી સુધારા પછી સ્વાસ્થ્ય માટે હાનિકારક માલ પર જીએસટી 28 ટકાથી વધારીને 40 ટકા કરવામાં આવ્યો હતો. ત્યારબાદ એક્સાઇઝ ડ્યુટીમાં નોંધપાત્ર વધારો થયો, જેના પરિણામે પ્રતિ સિગારેટ આશરે રૂ.બેથી 11નો વધારો થયો હતો. આનાથી એકંદર પેકના ભાવમાં 15-40 ટકાનો વધારો થયો હતો. ગોડફ્રે ફિલિપ્સ ઇન્ડિયા સહિત અન્ય તમાકુ કંપનીઓએ પણ તેમના ઉત્પાદનોના ભાવમાં વધારો કર્યો હતો.

સિગારેટના ભાવ વધારાના આ નવા સમાચાર બાદ, શેરબજારમાં તમાકુના શેરમાં તીવ્ર વધારો જોવા મળ્યો હતો. ગઈકાલે આઇટીસીના શેરના ભાવમાં લગભગ બે ટકાનો વધારો થયો હતો. ગોડફ્રે ફિલિપ્સ ઇન્ડિયા લિમિટેડના શેરમાં પણ ટ્રેડિંગ દરમિયાન દસ ટકાથી વધુનો ઉછાળો જોવા મળ્યો હતો.