રાજકોટ શહેરના જંગલેશ્વર વિસ્તારમાં મહાનગરપાલિકા દ્વારા હાથ ધરવામાં આવેલા મોટા પાયાના ડિમોલિશન પૂર્વે જ આજે ભારે અફરાતફરી અને માથાકૂટના દ્રશ્યો સર્જાયા હતા. તંત્ર દ્વારા બુલડોઝર ફેરવવામાં આવે તે પહેલા જ સ્થાનિકોના રોષનો જ્વાળા ફાટી નીકળ્યો હતો, જેને પગલે સમગ્ર વિસ્તાર પોલીસ છાવણીમાં ફેરવાઈ ગયો છે.

પોલીસ મથકે મહિલાઓનો હંગામો

ઘટનાની વિગત મુજબ, જંગલેશ્વરમાં વર્ષો જૂના દબાણો હટાવવાની પ્રક્રિયા શરૂ થાય તે પહેલા મોટી સંખ્યામાં સ્થાનિક મહિલાઓ એકઠી થઈ હતી. આ મહિલાઓ પોતાની રજૂઆત કરવા અને ડિમોલિશન અટકાવવા માટે વિસ્તારમાં ઉભા કરવામાં આવેલા હંગામી પોલીસ સ્ટેશન ખાતે પહોંચી હતી. મહિલાઓએ પોલીસ અધિકારીઓ સમક્ષ ઉગ્ર રજૂઆત કરી હતી કે તેમને વૈકલ્પિક વ્યવસ્થા વગર બેઘર કરવામાં ન આવે.

કાયદો-વ્યવસ્થા જાળવવા માટે પોલીસ તૈનાત 

સ્થિતિ ત્યારે વધુ વણસી જ્યારે રજૂઆત કરવા આવેલી મહિલાઓ અને પોલીસ અધિકારીઓ વચ્ચે ઉગ્ર બોલાચાલી થઈ હતી. કામગીરીમાં અવરોધ ઊભો થતો જોઈ, પોલીસે કડક વલણ અપનાવ્યું હતું. ઉચ્ચ પોલીસ અધિકારીઓની સૂચના બાદ, મહિલા પોલીસ કર્મીઓ દ્વારા હંગામો કરી રહેલી મહિલાઓને સ્થળ પરથી બહાર કાઢવામાં આવી હતી. પોલીસ દ્વારા ટોળાને વિખેરવા માટે ચુસ્ત બંદોબસ્ત ગોઠવી દેવામાં આવ્યો છે અને વિસ્તારમાં અવરજવર પર પ્રતિબંધ મૂકી દેવામાં આવ્યો છે. તંત્રનું કહેવું છે કે સરકારી જમીન પરના દબાણો દૂર કરવા માટે આ કાર્યવાહી અનિવાર્ય છે અને કાયદો-વ્યવસ્થા જાળવવા માટે પોલીસ તૈનાત કરવામાં આવી છે.

તંત્ર ડિમોલિશન માટે મક્કમ 

હાલ જંગલેશ્વર વિસ્તારમાં ભારે તણાવ જોવા મળી રહ્યો છે. એક તરફ તંત્ર ડિમોલિશન માટે મક્કમ છે, તો બીજી તરફ પોતાના ઘર ગુમાવનારા પરિવારો, ખાસ કરીને મહિલાઓ અને વૃદ્ધોની લાચારી દ્રશ્યમાન થઈ રહી છે. પોલીસ અને સ્થાનિકો વચ્ચેની આ માથાકૂટે વહીવટી તંત્રની કામગીરી સામે અનેક સવાલો ઉભા કર્યા છે.