સૌરાષ્ટ્ર યુનિવર્સિટીએ તેના સ્થાપનાકાળથી માંડી આજ સુધીમાં પ્રથમ વખત જુદા જુદા અભ્યાસક્રમોની મહત્તમ ફી નક્કી કરી છે. પરંતુ અમુક કોલેજો દ્વારા ગુજરાત કોમન એડમિશન પોર્ટલ પર 'જીકાસ' પર સૌરાષ્ટ્ર યુનિવર્સિટી એ નક્કી કરેલી ફી કરતાં વધુ ફી દર્શાવી હોવાનો વિવાદ ઊભો થતા યુનિવર્સિટીએ તમામ કોલેજોને આ સંદર્ભે એક પરિપત્ર મોકલી આપ્યો છે.

યુનિવર્સિટીના રજીસ્ટર દ્વારા કોલેજોના સંચાલકોને અને આચાર્યોને મોકલવામાં આવેલા પરિપત્રમાં જણાવ્યા મુજબ યુનિવર્સિટી એ નક્કી કરેલી ફી કરતાં અમુક કોલેજોએ જીકાસ પોર્ટલ પર વધુ ફી દર્શાવી છે. ફી નક્કી કરવા માટે ફી નિર્ધારણ સમિતિની ટૂંક સમયમાં રચના કરવામાં આવશે અને નિવૃત્ત જજ તેમના અધ્યક્ષ સ્થાને રહેશે.

કોલેજોએ જીકાસ પર જુદા જુદા અભ્યાસક્રમ બાબતે પોતાનું ફી નું જે માળખું દર્શાવ્યું છે તે આવી ફી રેગ્યુલરેટરી કમિટીની મંજૂરીને આધીન રહેશે અને તેનાથી વધુ ફી કોઈ કોલેજો લઇ નહીં શકે. જો કોઈ કિસ્સામાં કોલેજો વધુ ફી લેતી હોવાનું જણાશે તો તેમની સામે કાર્યવાહી કરવામાં આવશે.

સૌરાષ્ટ્ર યુનિવર્સિટીએ જુદાજુદા અભ્યાસક્રમોની નક્કી કરેલી ફી કરતાં અમુક કોલેજો એ પોર્ટલ પર વધુ ફી દર્શાવતા તે મામલે વિદ્યાર્થી સંગઠનો દ્વારા આંદોલનો કરવામાં આવ્યા હતા અને ત્યાર પછી યુનિવર્સિટીએ આ સંદર્ભે પરિપત્ર બહાર પાડવો પડ્યો છે. યુનિવર્સિટીના સુત્રોના જણાવ્યા મુજબ અત્યંત ટૂંકા સમયગાળામાં કોર્ટના નિવૃત્ત જજ ના અધ્યક્ષ સ્થાને ફી રેગ્યુલરેટરી કમિટીની રચના કરવામાં આવશે અને તેની વિધિવત જાહેરાત પણ કરવામાં આવશે.

બીજી બાજુ ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 12 સામાન્ય પ્રવાહ, ધોરણ 12 વિજ્ઞાન પ્રવાહના પરિણામો જાહેર થઈ ગયા છે અને જીકાસ પોર્ટલ પર સ્નાતક કક્ષામાં એડમિશન પૂર્વેની રજીસ્ટ્રેશનની પ્રક્રિયા શરૂ થઈ ગઈ છે. વિદ્યાર્થીઓના માહિતી અને માર્ગદર્શન માટે યુનિવર્સિટી દ્વારા અને કોલેજ કક્ષાએ ખાસ સેન્ટરો પણ શરૂ કરી દેવામાં આવ્યા છે. ડિગ્રી અભ્યાસક્રમોના પરિણામો જાહેર થયા પછી અનુસ્નાતક કક્ષાના અભ્યાસક્રમોમાં પણ પ્રવેશની પ્રક્રિયા હાથ ધરવામાં આવશે.