વેનેઝુએલામાં અમેરિકાની લશ્કરી કાર્યવાહી બાદ, લેટિન અમેરિકામાં તણાવ વધી રહ્યો છે અને હવે આ વખતે, કોલંબિયા અમેરિકાનું નિશાન બની શકે છે. આ દાવો કોલંબિયાના પોતાના રાષ્ટ્રપતિ ગુસ્તાવો પેટ્રો દ્વારા કરવામાં આવ્યો છે. તેમણે યુએસ રાષ્ટ્રપતિ ડોનાલ્ડ ટ્રમ્પને ચેતવણી આપતા કહ્યું, "જો તમારી પાસે હિંમત હોય તો આવો! હું અહીં રાહ જોઈ રહ્યો છું.ડોનાલ્ડ ટ્રમ્પે વેનેઝુએલા સામેની કાર્યવાહી પછી એક નિવેદનમાં કહ્યું હતું કે કોલંબિયા એક બીમાર નેતા દ્વારા ચલાવવામાં આવી રહ્યું છે જે અમેરિકાને કોકેઈન સપ્લાય કરે છે. ટ્રમ્પે તો એમ પણ કહ્યું હતું કે કોલંબિયા સામે લશ્કરી કાર્યવાહી એક સારો વિચાર હોઈ શકે છે. આ નિવેદનથી બોગોટા કે જે કોલંબિયાની રાજધાની છે ત્યાં રાજકીય અશાંતિ ફેલાઈ ગઈ.

જો કોઈ હુમલો થયો તો જોયા જેવી કરીશ: પેટ્રો

કોલંબિયાના રાષ્ટ્રપતિ ગુસ્તાવો પેટ્રોએ ટ્રમ્પને જવાબ આપતા કહ્યું, "જો અમેરિકા હુમલો કરશે, તો પરિસ્થિતિ નિયંત્રણ બહાર થઈ જશે." તેમણે ચેતવણી આપી હતી કે અમેરિકાના હુમલાની સ્થિતિમાં, દેશને શસ્ત્રો ઉપાડવાની ફરજ પડી શકે છે અને સંપૂર્ણ પાયે ગેરિલા સંઘર્ષ ફાટી શકે છે. પેટ્રોએ એમ પણ કહ્યું કે જો કોઈ લોકપ્રિય રાષ્ટ્રપતિની ધરપકડ કરવાનો પ્રયાસ કરવામાં આવશે, તો લોકોનો ગુસ્સો જગુઆરની જેમ ફાટી નીકળશે.એક સમયે ડાબેરી ગેરિલા તરીકે સેવા આપનારા પેટ્રોના એક મુખ્ય નિવેદનમાં કહેવામાં આવ્યું છે કે તેમણે દાયકાઓ પહેલા શસ્ત્રો છોડી દેવાની પ્રતિજ્ઞા લીધી હતી, પરંતુ જો દેશની સાર્વભૌમત્વને જોખમ થાય છે, તો તેઓ ફરીથી સંઘર્ષ માટે તૈયાર થઈ શકે છે. આ નિવેદનની આંતરરાષ્ટ્રીય સ્તરે વ્યાપક ચર્ચા થઈ છે.

કોલંબિયાની સરકારે સંતુલિત અભિગમ અપનાવ્યો

જોકે, રાષ્ટ્રપતિના આવા લડાયક નિવેદન પછી, કોલંબિયાના વિદેશ મંત્રાલયે પરિસ્થિતિને સંભાળવાનો પ્રયાસ કર્યો. મંત્રાલયે સ્પષ્ટતા કરી હતી કે કોલંબિયા સંવાદ અને પરસ્પર આદર પર આધારિત આંતરરાષ્ટ્રીય સંબંધો ઇચ્છે છે અને કોઈપણ પ્રકારની ધમકી કે બળપ્રયોગ સ્વીકારતું નથી.અહી જણાવી દઈએ કે

ટ્રમ્પ અને પેટ્રો વચ્ચે આ પહેલી વાર ટકરાવ થયો નથી. ઓક્ટોબરમાં, અમેરિકાએ ડ્રગ હેરફેરના આરોપસર પેટ્રો અને તેમના પરિવારના કેટલાક સભ્યો પર પ્રતિબંધો લાદ્યા હતા. કોલંબિયાને વિશ્વનું સૌથી મોટું કોકેઈન ઉત્પાદન કેન્દ્ર માનવામાં આવે છે, જે પરિસ્થિતિ લાંબા સમયથી અમેરિકાને ગુસ્સે કરે છે.

વેનેઝુએલા પછીનું અમેરિકાનું લક્ષ્ય?

ઉલ્લેખનીય છે કે થોડા મહિના પહેલા, વેનેઝુએલાના રાષ્ટ્રપતિ નિકોલસ માદુરોએ પણ ટ્રમ્પને ખુલ્લેઆમ પડકાર આપ્યો હતો. આ પછી, અમેરિકાએ એક મોટી કાર્યવાહી શરૂ કરી અને માદુરોની ધરપકડ કરી. હવે, પેટ્રોના પડકારને આ દ્રષ્ટિકોણથી જોવામાં આવી રહ્યો છે, જેનાથી ડર છે કે યુએસ-લેટિન અમેરિકન સંબંધો વધુ તણાવપૂર્ણ બની શકે છે.