અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ (SVPI) પરથી સોનાની દાણચોરી (Gold Smuggling) નો વધુ એક મોટો કિસ્સો પ્રકાશમાં આવ્યો છે. એરપોર્ટ કસ્ટમ્સ વિભાગની ટીમે સચોટ બાતમી અને આધુનિક સ્કેનિંગ પદ્ધતિના આધારે વિદેશથી સોનું છુપાવીને લાવેલા એક મુસાફરને દબોચી લીધો છે.

અમદાવાદ ઇન્ટરનેશનલ એરપોર્ટ પર કસ્ટમ્સ વિભાગની ટીમે સોનાની સ્મગલિંગ અટકાવવા માટે ચાંપતી નજર ગોઠવી દીધી છે. એરપોર્ટ પર તૈનાત કસ્ટમ્સના એર ઇન્ટેલિજન્સ યુનિટે (AIU) મધ્યપૂર્વના દેશ શારજાહથી (Sharjah) આવેલા એક ભારતીય મુસાફરને અટકાવીને તેની સઘન તલાશી લીધી હતી. આ મુસાફરની લગેજ બેગની અંદરથી કસ્ટમ્સના અધિકારીઓને ૬૦૦ ગ્રામ સોનાનો કિંમતી જથ્થો મળી આવ્યો હતો, જેની આંતરરાષ્ટ્રીય બજાર કિંમત અંદાજે ૬૦ લાખ રૂપિયાથી વધુ હોવાનું આંકવામાં આવ્યું છે.

બેગમાં છુપાવ્યું હતું અલગ-અલગ પ્યોરિટીનું સોનું
કસ્ટમ્સ વિભાગના સત્તાવાર સૂત્રો પાસેથી મળતી માહિતી અનુસાર, ઝડપાયેલો મુસાફર એર અરેબિયાની ફ્લાઈટ મારફતે અમદાવાદ ઉતર્યો હતો. મુસાફરે કસ્ટમ ડ્યુટી (ટેક્સ) ચોરી કરવાના ઈરાદે પોતાના અંગત સામાનની બેગમાં સોનું અત્યંત સિફતપૂર્વક છુપાવ્યું હતું, જેથી મેટલ ડિટેક્ટર કે એક્સ-રે મશીનમાં સામાન્ય નજરે પકડાઈ ન શકાય. જપ્ત કરવામાં આવેલા ૬૦૦ ગ્રામ સોનામાં કસ્ટમ્સ ટીમને 18K (750 Purity) અને 14K (585 Purity) નું સોનું મળી આવ્યું છે, જેને દાગીના કે અન્ય સ્વરૂપે વિદેશથી લાવવામાં આવી રહ્યું હતું.