શ્રીલંકામાં વિનાશ સર્જ્યા બાદ, ચક્રવાત દિતવાહ ઝડપથી ભારત તરફ આગળ વધી રહ્યું છે. આ વાવાઝોડું આજે ગમે ત્યારે ઉત્તર તમિલનાડુ, પુડુચેરી અને દક્ષિણ આંધ્રપ્રદેશના દરિયાકાંઠે ટકરાશે. હવામાન વિભાગે આ અંગે ચેતવણી જારી કરી છે. પરિસ્થિતિને ધ્યાનમાં રાખીને, NDRFની 14 ટીમો સ્થળ પર તૈનાત કરવામાં આવી છે. ચક્રવાત દિતવાહને કારણે શ્રીલંકામાં 150 લોકોનાં મોત થયા છે. આ ઉપરાંત, ઘણા લોકો ગુમ થયાના અહેવાલ છે. દક્ષિણ-પશ્ચિમ બંગાળની ખાડી અને નજીકના ઉત્તર શ્રીલંકા અને તમિલનાડુના દરિયાકાંઠે ત્રાટકતું ચક્રવાત દિતવાહ છેલ્લા 6 કલાક દરમિયાન લગભગ 5 કિમી પ્રતિ કલાકની ઝડપે ઉત્તર તરફ આગળ વધ્યું છે. વડોદરાથી NDRFની 5 ટીમને ચેન્નાઈમાં તૈનાત કરવા આવી છે.​​​​​​​

ચક્રવાત દિતવાહ આ માર્ગે ભારત તરફ આગળ વધી રહ્યું છે

ચક્રવાત દિતવાહ 29 નવેમ્બર 2025ના રોજ રાત્રે 11:30 વાગ્યે દક્ષિણપશ્ચિમ બંગાળની ખાડી અને નજીકના ઉત્તર તમિલનાડુ-પુડુચેરી દરિયાકાંઠે, 10.7°N અક્ષાંશ અને 80.6°E રેખાંશની નજીક, વેદારણ્યમથી લગભગ 90 કિમી પૂર્વ અને ઉત્તરપૂર્વમાં, કરાઈકલથી 90 કિમી પૂર્વ અને દક્ષિણપૂર્વમાં, શ્રીલંકાના જાફનાથી 130 કિમી ઉત્તર અને ઉત્તરપૂર્વમાં, પુડુચેરીથી 160 કિમી દક્ષિણ અને દક્ષિણપૂર્વમાં અને ચેન્નાઈથી 260 કિમી દક્ષિણમાં કેન્દ્રિત હતું.

ચક્રવાત દિતવાહ ભારત ક્યારે પહોંચશે?

હવામાન વિભાગની આગાહી મુજબ, ચક્રવાત દિટવાહ આગામી 24 કલાકમાં ઉત્તર તમિલનાડુ અને પુડુચેરીના દરિયાકાંઠાની સમાંતર ઉત્તર તરફ આગળ વધવાની શક્યતા છે. ચક્રવાત દિતવાહ હાલમાં 5 કિલોમીટર પ્રતિ કલાકની ઝડપે આગળ વધી રહ્યું છે. 30 નવેમ્બર, 2025ના રોજ સવારે 2:30 વાગ્યે, તે દક્ષિણપશ્ચિમ બંગાળની ખાડી અને શ્રીલંકા અને તમિલનાડુના દરિયાકાંઠા પર, પુડુચેરીથી લગભગ 160 કિલોમીટર દક્ષિણ અને દક્ષિણપૂર્વમાં અને ચેન્નાઈથી 250 કિલોમીટર દક્ષિણમાં કેન્દ્રિત હતું. ઉત્તર તરફ આગળ વધતા, ચક્રવાત દિટવાહ 30 નવેમ્બરની સવાર અને સાંજ સુધીમાં તમિલનાડુ અને પુડુચેરીના દરિયાકાંઠાથી અનુક્રમે 50 કિલોમીટર અને 25 કિલોમીટરના અંતરે, દક્ષિણપશ્ચિમ બંગાળની ખાડી પર કેન્દ્રિત થશે.

પ્રાદેશિક હવામાન કેન્દ્રની આગાહી મુજબ, રવિવારે મોટાભાગનો વરસાદ ઉત્તર તમિલનાડુમાં કેન્દ્રિત થશે, ત્યારબાદ 1 ડિસેમ્બરથી વરસાદ અને પવન ધીમે ધીમે ઘટશે. ચક્રવાત દિતવાહના કારણે શુક્રવાર રાતથી તમિલનાડુના ઘણા દક્ષિણ દરિયાકાંઠાના અને ડેલ્ટા જિલ્લાઓમાં ભારે વરસાદ પડ્યો છે, જેના કારણે રહેણાંક વિસ્તારોમાં પાણી ભરાઈ ગયા છે અને ઉભા પાકને નુકસાન થયું છે.

કોલંબો એરપોર્ટ પર લગભગ 300 ભારતીયો ફસાયા 

આ દરમિયાન, કેરળના મુખ્યમંત્રી પિનરાઈ વિજયને વિદેશ મંત્રી એસ. જયશંકરને પત્ર લખીને ચક્રવાત દિતવાહને કારણે શ્રીલંકામાં ફસાયેલા ભારતીયોને રાજ્ય સરકાર તરફથી તમામ શક્ય સહાયની ઓફર કરી છે. વિજયને પોતાના પત્રમાં જણાવ્યું હતું કે ચક્રવાત દિતવાહને કારણે શ્રીલંકાના કોલંબોમાં બંધારનાયકે આંતરરાષ્ટ્રીય વિમાનમથક પર ભારે અરાજકતા સર્જાઈ છે, જેના કારણે લગભગ 300 ભારતીય મુસાફરો ફસાયા છે, જેમાંથી ઘણા કેરળના રહેવાસી છે. તેમણે સમજાવ્યું કે ભારતીય મુસાફરો છેલ્લા ત્રણ દિવસથી ફસાયેલા છે અને પૂરતા ખોરાક, પાણી અને મૂળભૂત સુવિધાઓનો અભાવ છે. "અમે ફસાયેલા લોકોની દુર્દશા અંગે ચિંતિત છીએ." કેરળ સરકાર જરૂરી તમામ મદદ પૂરી પાડવા માટે તૈયાર છે.

વાવાઝોડાની 3 રાજ્યોમાં અસર, શું છે તૈયારી...

તમિલનાડુ

14 NDRF ટીમો તૈનાત છે. પુણે અને વડોદરાથી વધુ 10 ટીમો ચેન્નઈ મોકલવામાં આવી છે.

રામેશ્વરમ-ચેન્નઈ સેક્ટરમાં 11 ટ્રેનોનો રૂટ બદલવામાં આવ્યો છે.

ઇન્ડિગોએ જાફના, તુતીકોરિન અને તિરુચિરાપલ્લી આવતી-જતી ફ્લાઇટ્સ રદ કરી છે.

પુડુચેરી

પુડુચેરીમાં વાવાઝોડાનો સામનો કરવા માટે NDRFની 2 ટીમો તૈનાત કરવામાં આવી.

સેન્ટ્રલ યુનિવર્સિટીએ રજા જાહેર કરીને તમામ પરીક્ષાઓ મુલતવી રાખી.

પુડુચેરી, કરાઈકલ, માહે અને યનમમાં સોમવાર સુધી તમામ શાળાઓ અને કોલેજો બંધ રહેશે.

આંધ્ર પ્રદેશ

3 ડિસેમ્બર સુધી આંધ્ર પ્રદેશના કેટલાક ભાગોમાં ભારે વરસાદ થવાની સંભાવના છે.

તમિલનાડુ: નાગપટ્ટિનમમાં મંદિરના ગર્ભગૃહમાં પાણી ભરાઈ ગયું

તમિલનાડુના નાગપટ્ટિનમમાં ભારે વરસાદ બાદ અરુલમિગુ વેદારણ્યેશ્વર સ્વામી મંદિરના ગર્ભગૃહની બહાર પાણી ભરાઈ ગયું.

તોફાનથી શ્રીલંકામાં તબાહી, ભારતનું ઓપરેશન સાગર બંધુ

ભારતને સાયક્લોન દિતવાહથી તબાહીના કારણે શ્રીલંકાની મદદ માટે શનિવારે ઓપરેશન સાગર બંધુ લોન્ચ કર્યું. વિદેશ મંત્રી એસ. જયશંકરે X પર જણાવ્યું કે ભારતીય વાયુસેનાનું IL-76 એરક્રાફ્ટ કોલંબો પહોંચી ગયું છે. NDRFના 80 કર્મીઓની ટીમો સાથે હવાઈ અને સમુદ્રી માર્ગે હવે લગભગ 27 ટન રાહત સામગ્રી પહોંચાડવામાં આવી છે.