ડેવિડ ધવને બોલીવુડમાં લગભગ ૪૫ વર્ષ સુધી પોતાની હાસ્યસભર ફિલ્મોથી દર્શકોને મનોરંજન આપ્યા બાદ હવે નિવૃત્તિ લેવાનો મોટો નિર્ણય લીધો છે. તેમની છેલ્લી ફિલ્મ પોતાના પુત્ર વરુણ ધવન સાથેની ‘હૈ જવાની  તો ઇશ્ક હોના હૈ’ રહેશે. આ જાહેરાત બાદ ફિલ્મ ઉદ્યોગ અને ચાહકોમાં આશ્ચર્ય ફેલાયું છે.તાજેતરમાં યોજાયેલા ફિલ્મના ટ્રેલર લોન્ચ કાર્યક્રમ દરમિયાન ડેવિડ ધવન ખૂબ જ ભાવુક નજર આવ્યા હતા. મીડિયા સાથે વાતચીત કરતાં તેમણે પોતાના પુત્ર વરુણ ધવનની પ્રશંસા કરી હતી. તેમણે જણાવ્યું કે વર્ષ ૨૦૨૨માં જ્યારે તેઓ ગંભીર રીતે બીમાર પડ્યા હતા, ત્યારે વરુણ હોસ્પિટલમાં તેમની સાથે જ રહેતો હતો. પિતાને ભાવુક બનતા જોઈ વરુણે તેમને શાંત પાડ્યા હતા. ‘હૈ જવાની  તો ઇશ્ક હોના હૈ’ ૫ જૂને સિનેમાઘરોમાં રજૂ થવાની છે અને આ જ ફિલ્મ ડેવિડ ધવનના દિગ્દર્શન કારકિર્દીની છેલ્લી ફિલ્મ માનવામાં આવી રહી છે.૨૩ મે ૨૦૨૬ના રોજ ડેવિડ ધવને સત્તાવાર રીતે દિગ્દર્શન ક્ષેત્રમાંથી નિવૃત્તિની જાહેરાત કરી હતી. આ પ્રસંગે યોજાયેલી વિશેષ પાર્ટીમાં સલમાન ખાન, કરણ જોહર, પૂજા હેગડે, વરુણ ધવન અને ચંકી પાંડે સહિત અનેક જાણીતા કલાકારો હાજર રહ્યા હતા. કરણ જોહરે પોતાના સામાજિક માધ્યમ પર લખ્યું કે ડેવિડ ધવને તેમને જણાવ્યું હતું કે ‘હૈ જવાની  તો ઇશ્ક હોના હૈ’ તેમની છેલ્લી ફિલ્મ રહેશે. ડેવિડ ધવનને બોલીવુડના સૌથી સફળ હાસ્ય ફિલ્મ નિર્માતાઓમાં ગણવામાં આવે છે. ખાસ કરીને ૧૯૯૦ અને ૨૦૦૦ના દાયકામાં તેમણે એક પછી એક સુપરહિટ ફિલ્મો આપી હતી. તેમની યાદગાર ફિલ્મોમાં ‘રાજા બાબુ’, ‘જુડવા’, ‘પાર્ટનર’, ‘હીરો નંબર ૧’, ‘મુઝસે શાદી કરોગી’ અને ‘કૂલી નંબર ૧’ જેવી અનેક ફિલ્મોનો સમાવેશ થાય છે. આ ફિલ્મોએ દર્શકોને ખૂબ હસાવ્યા હતા અને ટિકિટ બારી પર મોટી સફળતા મેળવી હતી.ડેવિડ ધવને પોતાના લાંબા કારકિર્દી દરમિયાન અમિતાભ બચ્ચન, ગોવિંદા, સલમાન ખાન, અક્ષય કુમાર, માધુરી દીક્ષિત અને કરિશ્મા કપૂર જેવા અનેક મોટા કલાકારો સાથે કામ કર્યું છે. લગભગ છ વર્ષના વિરામ બાદ તેઓ ફરી દિગ્દર્શન ક્ષેત્રે પરત ફર્યા હતા. તેમની છેલ્લી ફિલ્મ ‘હૈ જવાની  તો ઇશ્ક હોના હૈ’માં વરુણ ધવન ઉપરાંત મૃણાલ ઠાકુર, પૂજા હેગડે, મૌની રોય, રાકેશ બેદી, રાજેશ કુમાર અને મનીષ પોલ પણ જોવા મળશે.