લોધીકા તાલુકાના કાંગશીયાળી ગામે રહેતા અને નોકરી કરી પોતાનું તથા પોતાના પરિવારનું ગુજરાન ચલાવતા માનસિંઘભાઈ બારડની પુત્રી શ્રી જન્મજાત મુકબધીર હોવાનું નિદાન થયા પછી રાજકોટ જિલ્લા પંચાયતની આરોગ્ય વિભાગની ટીમે આ બાળકીને રુ. 8 થી 9 લાખના ખર્ચે જે સારવાર મળતી હોય છે તે સંપૂર્ણ પણે મફતમાં અપાવી બાળકીને સાંભળતી કરી દીધી છે અને હવે બોલતી કરવા માટેના પ્રયત્નો શરૂ થઈ ગયા છે.

રાજકોટ જિલ્લા પંચાયતના આરોગ્ય અધિકારી ડોક્ટર આર. આર. ફુલમાલીના માર્ગદર્શન હેઠળ રાજકોટ જિલ્લાના ગ્રામ્ય વિસ્તારમાં આશા વર્કરો દ્વારા સમયાંતરે ઘેર ઘેર ફરી સર્વે કરવામાં આવતો હોય છે. આવા એક સર્વે દરમિયાન શ્રી નામની માત્ર બે વર્ષની બાળકી બુકબધીર હોવાનું ધ્યાન પર આવતા આરબીએસકે ટીમના મોહિતસિંહ જાડેજા અને ડોક્ટર શાહેને આ બાબતે જિલ્લા પંચાયતના આરોગ્ય વિભાગના અધિકારીઓને જાણ કરી હતી. સારવારમાં રૂપિયા ૮ થી લાખ 9 લાખનો ખર્ચ થતો હોવાનું સાંભળી આ સામાન્ય પરિવારમાં ચિંતા થઈ હતી. પરંતુ સરકારની યોજનામાંથી સમગ્ર સંપૂર્ણ સારવાર મળશે તેવું જણાવતા હાશકારાની લાગણી થઈ હતી.

શ્રી માનસિંગભાઈ બારડ નામની આ બાળકીને રાજકોટ ખાતેની પીડીયુ હોસ્પિટલમાં દાખલ કર્યા પછી તેનું નિદાન કરવામાં આવ્યું હતું અને વધુ સારવાર તથા ઓપરેશન માટે ગુજરાત મેડિકલ એન્ડ રિસર્ચ સોસાયટી, અમદાવાદ ખાતે દાખલ કરવામાં આવી હતી. કાન માટે કોકિલિયર ઈનપ્લાન્ટ નું સફળ ઓપરેશન કરવામાં આવ્યા પછી અત્યારે શ્રી સાંભળી રહી છે અને હવે તેને બોલતી કરવા માટે સ્પીચ થેરાપીની સારવાર ચાલુ છે.