જૂનાગઢમાં સફાઈ કર્મીઓના પડતર પ્રશ્નોના ઉકેલતા આજે કર્મચારીઓએ વીજળીક હડતાળ પર ઉતર્યા છે. શ્રાવણ માસના સોમવારે જ શહેરમાં સફાઈ વ્યવસ્થા ખોરંભે પડતા અનેક વિસ્તારોમાં કચરાના ખડકલા જોવા મળી રહ્યા છે. સફાઈ કર્મચારીઓ દ્વારા આઝાદ ચોકમાં ધરણા પર બેસી વિરોધ પ્રદર્શિત કરી રહ્યા છે.  જૂનાગઢમાં સફાઈ કર્મચારીઓ તથા આશાવર્કર બહેનોના બે માસથી પગાર થયા નથી. જે મુદ્દે યુનિયન દ્વારા અનેક વખત તંત્રને રજૂઆત કરી છે. પરંતુ હજુ સુધી કોઈ કાર્યવાહી જ થઈ નથી. આ ઉપરાંત યુનિયન પ્રમુખ વિરુદ્ધ સોશિયલ મીડિયામાં ખોટા આક્ષેપ પણ થઈ રહ્યા છે. જેથી સફાઈ કર્મચારીઓમાં રોષ ફેલાયો છે. આજે જૂનાગઢમાં સફાઈ કર્મચારીઓએ હડતાળનું એલાન કર્યું છે. આ ઉપરાંત એ ડિવિઝનમાં લેખિત ફરિયાદની પણ તજવીજ હાથ ધરી છે. આજે સવારે આઝાદ ચોકમાં સફાઈ કર્મચારીઓએ ધરણા કર્યા હતા . અને બપોરે મહાનગરપાલિકા કચેરીએ રજૂઆત કરવા પહોંચ્યા હતા. હડતાળના  કારણે અનેક વિસ્તારોમાં કચરાના ખડકલા જોવા મળી રહ્યા છે. સફાઈ યુનિયનના પ્રમુખ વિજયભાઈ વાળાના જણાવ્યા મુજબ કર્મચારીઓના પગાર પણ થતા નથી જેના કારણે સફાઈ કર્મચારી સાથે અન્ય વર્કર બહેનો પણ આંદોલનમાં જોડાઈ છે. પડતર પ્રશ્નો ઉકેલવાની માંગ સાથે આઝાદ ચોકમાં ધરણા પર બેસી વિરોધ પ્રદર્શિત કરવામાં આવી રહ્યો છે. આજે શ્રાવણ માસનો બીજો સોમવાર છે. તહેવારો સમયે જ સફાઈ કર્મચારીઓની હડતાળના કારણે અનેક વિસ્તારમાં ગંદકીના ગંજ અને કચરાના ખડકલા જોવા મળી રહ્યા છે. આ ઉપરાંત હાજરી પૂરવા બાબતે પણ વિરોધ હોવાના આક્ષેપો થઈ રહ્યા છે. કર્મચારીઓની માંગ નહીં ઉકેલવામાં આવે તો હજુ ઉગ્ર આંદોલન કરવાની પણ ચીમકી આપી છે. હાલ તો સફાઈ કર્મચારીઓ દ્વારા સફાઈ બંધ કરતાં ડોર ટુ ડોર વાહન ચાલકોની ટીમને તંત્ર દ્વારા દોડાવવામાં આવી રહી છે.