કેન્દ્રીય મંત્રી અશ્વિની વૈષ્ણવ અમેરિકાની મુલાકાતે પહોચ્યા છે અને તેઓ વિવિધ મહત્વપૂર્ણ બેઠકોમાં ભાગ લઈ રહ્યા છે. આ શ્રેણીના ભાગ રૂપે, તેમણે યુએસ ટ્રેઝરી સેક્રેટરી સ્કોટ બેસન્ટ દ્વારા આયોજિત ક્રિટિકલ મિનરલ્સ મંત્રીસ્તરીય બેઠકમાં ભાગ લીધો હતો.અને દુર્લભ પૃથ્વી ખનિજોને સુરક્ષિત રાખવા, ખનીજોને

રિસાયક્લિંગ કરવા સહિતના મુદાઓ પર વિગતે ચિચાર વિમર્શ કર્યો હતો અને આગામી રણનીતિ શું હોવી જોઈએ તેની ચર્ચા કરી હતી.

અશ્વિની વૈષ્ણવએ ત્યાની બેઠકમાં થયેલી ચર્ચાની વિગતો આપતા જણાવ્યું હતું કે યુએસ ટ્રેઝરી સેક્રેટરી સ્કોટ બેસન્ટે મહત્વપૂર્ણ ખનિજો માટે સપ્લાય ચેઇનને મજબૂત બનાવવા પર કેન્દ્રિત એક મંત્રીસ્તરીય બેઠકનું આયોજન કર્યું હતું. જેમ આપણે બધા જાણીએ છીએ, અને ખાસ કરીને ભારતમાં, જ્યારે ઉત્પાદન ક્ષેત્ર, ખાસ કરીને ઇલેક્ટ્રોનિક્સ મેન્યુફેક્ચરિંગ, ઝડપથી વિકસી રહ્યું છે, ત્યારે ભારત સહિત તમામ દેશો માટે મહત્વપૂર્ણ ખનિજો માટે મજબૂત સપ્લાય ચેઇન હોવી અત્યંત મહત્વપૂર્ણ છે.અશ્વિની વૈષ્ણવે જણાવ્યું હતું કે આ બેઠકમાં વિવિધ દેશોના સહભાગીઓએ તેમના અનુભવો અને ઉચ્ચ-ગુણવત્તાવાળા મહત્વપૂર્ણ ખનિજો, ખાસ કરીને દુર્લભ પૃથ્વી ખનિજોને લાંબા ગાળાના, ટકાઉ રીતે સુરક્ષિત કરવા માટે સપ્લાય ચેઇનને મજબૂત બનાવવા માટે લેવામાં આવતા પગલાંઓની ચર્ચા કરી હતી.

તેમણે વધુમાં જણાવ્યું હતું કે દેશો વચ્ચે ટેકનોલોજી શેરિંગની ચર્ચા કરવામાં આવી હતી. રિસાયક્લિંગ એક મહત્વપૂર્ણ વિષય હતો. દેશો વચ્ચે સંશોધન કાર્ય શેર કરવા પર ચર્ચા અને કરાર થયા હતા. આ ખૂબ જ સકારાત્મક બેઠક હતી, જેમાં મહત્વપૂર્ણ ખનિજોની ગુણવત્તા અને ઉપલબ્ધતામાં સુધારો કરવા પર ભાર મૂકવામાં આવ્યો હતો.

ખનિજોને સુરક્ષિત રાખવા ટ્રમ્પ તંત્રની ટોચની પ્રાથમિકતા

મહત્વપૂર્ણ અને દુર્લભ પૃથ્વી ખનિજોને સુરક્ષિત રાખવા એ ટ્રમ્પ વહીવટીતંત્રની ટોચની પ્રાથમિકતાઓમાંની એક છે. યુએસ વહીવટ જણાવે છે કે પ્રતિકૂળ વિદેશી શક્તિઓ દ્વારા ખનિજ ઉત્પાદન પર નિર્ભરતા યુએસ રાષ્ટ્રીય અને આર્થિક સુરક્ષા માટે ગંભીર ખતરો છે. ઇન્ટરનેશનલ એનર્જી એજન્સી અનુસાર, ચીન તાંબુ, લિથિયમ, નિકલ, કોબાલ્ટ, ગ્રેફાઇટ અને દુર્લભ પૃથ્વી ખનિજો સહિત મોટાભાગના ખનિજોનો અગ્રણી રિફાઇનર છે, જેનો સરેરાશ બજાર હિસ્સો આશરે 70 ટકા છે.અગાઉ, અશ્વિની વૈષ્ણવે વ્હાઇટ હાઉસ ઓફિસ ઓફ સાયન્સ એન્ડ ટેકનોલોજી પોલિસીના ડિરેક્ટર અને યુએસ રાષ્ટ્રપતિ ડોનાલ્ડ ટ્રમ્પના સહાયક માઈકલ ક્રેટસિઓસ સાથે મુલાકાત કરી હતી. ક્રેટસિઓસે લખ્યું હતું કે, મેં વ્હાઇટ હાઉસમાં મંત્રી અશ્વિની વૈષ્ણવ અને અમેરિકામાં ભારતીય રાજદૂત વિનય મોહન ક્વાત્રા સાથે મુલાકાત કરી હતી અને ભારતમાં આગામી એઆઈ ઇમ્પેક્ટ સમિટ અંગે ચર્ચા કરી હતી. અમે આવતા મહિને દિલ્હીમાં ફરી મળીશું.