યુરોપમાં ગેરકાયદેસર સ્થળાંતર (Migration) નો મુદ્દો સતત ગંભીર બનતો જઈ રહ્યો છે. રવિવારે (૬ સપ્ટેમ્બર) વહેલી સવારે ફ્રાન્સના દરિયાકાંઠેથી ડઝનેક પ્રવાસીઓએ રબરની નાની હોડીઓ (ડિંગ્ઝ) માં બેસીને જોખમી ઈંગ્લિશ ચેનલ પાર કરી બ્રિટન તરફ જવાનો પ્રયાસ કર્યો હતો.

ઘટનાસ્થળે ફ્રેન્ચ પોલીસ પગપાળા અને પેટ્રોલિંગ બોટ દ્વારા આ પ્રવૃત્તિ પર નજર રાખી રહી હતી. પોલીસે આ હોડીઓને રોકવા અને તેના રવાના થવા સામે અવરોધ ઊભો કરવાનો પ્રયાસ કર્યો હતો. તેમ છતાં કેટલીક હોડીઓ ફ્રાન્સના દરિયાકાંઠેથી નીકળવામાં સફળ રહી હતી, જ્યારે ડઝનેક માઈગ્રન્ટ્સ હોડીમાં સવાર થઈ શક્યા ન હોવાથી કિનારે જ રહી ગયા હતા.

EU ની નવી એજન્સી અને સુરક્ષા પગલાં
ફ્રાન્સ અને બ્રિટનના નેતાઓ વચ્ચે થયેલી બેઠક બાદ, યુરોપિયન યુનિયનની બોર્ડર એજન્સી (Frontex) એ શુક્રવારે જાહેરાત કરી હતી કે તે સર્ચ અને રેસ્ક્યુ ઓપરેશનમાં મદદ કરવા માટે ઈંગ્લિશ ચેનલ અને નોર્થ સીમાં પોતાની બોટ મોકલશે. સત્તાવાળાઓના જણાવ્યા મુજબ, ફ્રન્ટેક્સ સપ્ટેમ્બરથી ઓક્ટોબર દરમિયાન બે સ્પેનિશ બોટ અને ત્યારબાદ જાન્યુઆરી સુધી લિથુઆનીયાની એક બોટ ફ્રેન્ચ પેટ્રોલિંગ સાથે જોડવા માટે મોકલશે.

ચેનલ ક્રોસિંગનું જોખમ અને રાજકીય અસરો
ઈંગ્લિશ ચેનલ એ વિશ્વના સૌથી વ્યસ્ત શિપિંગ લેન્સ પૈકી એક છે. અહીંના મજબૂત પ્રવાહો વચ્ચે ફ્રાન્સથી બ્રિટન જવાના પ્રયાસમાં અગાઉ પણ ઘણા માઈગ્રન્ટ્સના જીવ ગયા છે. હ્યુમન ટ્રાફિકર્સ નિયમિતપણે રબરની હોડીઓમાં ક્ષમતા કરતાં વધુ લોકોને ભરી દે છે, જેના કારણે તે માંડ તરે તેવી સ્થિતિમાં હોય છે. ઓગસ્ટ મહિનામાં ફ્રેન્ચ કોસ્ટગાર્ડ્સે આગ લાગેલા એક જહાજમાંથી ૧૫૭ લોકોને બચાવવા પડ્યા હતા.

​​​​​​​બ્રિટન અને ફ્રાન્સ વચ્ચે આ ગેરકાયદેસર પ્રવાહને રોકવા માટે અગાઉ £૬૬૦ મિલિયન (આશરે $૮૯૨.૭૨ મિલિયન) ની સરહદ સુરક્ષા સોદો પણ થયો છે. તેમ છતાં, આ વિષય બ્રિટન સહિત સમગ્ર યુરોપમાં એક અત્યંત સંવેદનશીલ અને રાજકીય મુદ્દો બન્યો છે.