દ્વારકામાં દ્વારકાધીશ મંદિરની સાથોસાથ તેમના મુખ્ય પટ્ટરાણી રૂકમણીજી મંદિર પણ પૌરાણિક મહત્તા ધરાવતું હોય,ભારતના રક્ષિત સ્મારકોમાં સમાવિષ્ટ છે. અહીં આવેલ મંદિરમાં અદભૂત શિલ્પ સ્થાપત્ય જોવા મળતું હોય, હજારો યાત્રાળુઓની સાથોસાથ દર વર્ષે શિલ્પકલા પ્રેમીઓ પણ આ મંદિરના અનન્ય શિલ્પ સ્થાપત્ય નિહાળી અભિભૂત થતાં હોય છે.

જોકે, કમનસીબે દરિયાઈ ખારાશવાળા વિસ્તારમાં હોવાના લીધે તેમજ અપૂરતી જાળવણીને લીધે આ મંદિરની કોતરણીમાં કંડારાયેલ શિલ્પ સ્થાપત્યનો ખજાનો પત્થરો ખવાઈ જવાના કારણે જીર્ણ થતો જાય છે. દિવસને દિવસે મંદિરની હાલત ખરાબ થતી જાય છે. વર્ષો પહેલા કરાયેલ શિલ્પ કલા ધીમે ધીમે લુપ્ત થતી જાય છે ત્યારે વર્ષો જુના મંદિરોમાં કરાયેલા શિલ્પ કળાની જણાવણી થાય તે માટે સરકારે તુરંત કામગીરી શરૂ કરાવી જોઈએ.

રૂકમણીજીના આ અમૂલ્ય વારશાના મંદિરની શિલ્પ કલા જાળવી રાખવા રૂકમણીજીના ભક્તો, કૃષ્ણ ભક્તો દ્વારા સરકારને અનુરોધ કરાયો છે. અમૂલ્ય ધરોહરની જાળવણી અંગે સબંધિત તંત્ર દ્વારા તુરન્તમાં પગલા લેવાય તેવી કલાપ્રેમીઓની માંગ છે.