તુર્કીના ઈસ્તંબુલ સ્થિત એક મિડલ સ્કૂલમાં મંગળવારે ચપ્પુબાજીની એક સનસનાટીભરી ઘટના સામે આવી છે, જેમાં 8 વિદ્યાર્થીઓ ગંભીર રીતે ઘાયલ થયા છે. ઈસ્તંબુલના બસાકસેહિર જિલ્લામાં આવેલી કાયાસોહિર શેખ શામિલ ઈમામ હતિપ મિડલ સ્કૂલમાં અજ્ઞાત કારણોસર વિદ્યાર્થીઓ વચ્ચે અચાનક હિંસક ઝઘડો શરૂ થયો હતો. આ ઘટના બાદ શાળા સંકુલમાં ભારે અફડાતફડી મચી ગઈ હતી અને સ્થાનિક પ્રશાસન દ્વારા તાત્કાલિક ધોરણે તબીબી અને પોલીસ ટીમોને ઘટનાસ્થળે રવાના કરવામાં આવી હતી.

ઈસ્તંબુલના ગવર્નર કાર્યાલય દ્વારા જારી કરવામાં આવેલા નિવેદન મુજબ, સમગ્ર મામલાની ઊંડાણપૂર્વક તપાસ શરૂ કરી દેવામાં આવી છે. પ્રાથમિક તપાસમાં બહાર આવ્યું છે કે અન્ય એક શાળાની વિદ્યાર્થીની તે શાળાનો યુનિફોર્મ પહેરીને આ મિડલ સ્કૂલમાં ઘૂસી ગઈ હતી. ત્યારબાદ તેણે અચાનક વિદ્યાર્થીઓ પર ચપ્પુ વડે હુમલો કરી દીધો હતો. ઘટના બાદ સ્થાનિક સુરક્ષા દળોએ તાત્કાલિક પગલાં ભરીને હુમલાનો આરોપ ધરાવતી શંકાસ્પદ વિદ્યાર્થીનીને કસ્ટડીમાં લઈ લીધી છે અને તેની પૂછપરછ હાથ ધરી છે.

તમામ ઘાયલ વિદ્યાર્થીઓને ત્વરિત તબીબી સારવાર આપવા માટે નજીકની હોસ્પિટલોમાં દાખલ કરવામાં આવ્યા છે. તુર્કીના આરોગ્ય મંત્રી કેમલ મેમિસોગ્લુએ આ દુઃખદ ઘટના અંગે માહિતી આપતાં જણાવ્યું હતું કે કુલ 8 ઘાયલ વિદ્યાર્થીઓ હોસ્પિટલમાં સારવાર હેઠળ છે. આ ઘાયલોમાંથી 1 વિદ્યાર્થીની સ્થિતિ અત્યંત નાજુક છે, જ્યારે અન્ય 2 વિદ્યાર્થીઓની હાલત ગંભીરથી મધ્યમ સ્તરની હોવાનું કહેવાઈ રહ્યું છે. બાકીના વિદ્યાર્થીઓ ખતરા બહાર હોવાનું જાણવા મળ્યું છે.

​​​​​​​આરોગ્ય મંત્રીએ સોશિયલ મીડિયા પ્લેટફોર્મ એક્સ પર પોસ્ટ કરીને ઘાયલ વિદ્યાર્થીઓ અને તેમના પરિવારો પ્રત્યે સંવેદના વ્યક્ત કરી હતી. તેમણે લખ્યું હતું કે, "બસાકસેહિરની મિડલ સ્કૂલમાં થયેલા હુમલામાં ઘાયલ થયેલા તમામ બાળકો ઝડપથી સાજા થઈ જાય તેવી હું પ્રાર્થના કરું છું. હોસ્પિટલના ડોકટરો તમામ બાળકોની આરોગ્ય સ્થિતિ પર સતત અને બારીકાઈથી નજર રાખી રહ્યા છે." તુર્કીના જાણીતા સમાચાર પત્ર 'ડેલી સબાહ' મુજબ શાળામાં સુરક્ષા વ્યવસ્થા સામે પણ ગંભીર સવાલો ઉભા થયા છે.