વિશ્વ હવામાન સંગઠનએ ચેતવણી આપી છે કે ઉષ્ણકટિબંધીય પ્રશાંત મહાસાગરમાં વિકસતી અલ નિનો સ્થિતિ આગામી મહિનાઓમાં વધુ મજબૂત બની શકે છે.
આનાથી વિશ્વના ઘણા ભાગોમાં ગરમીના મોજા, દુષ્કાળ, અતિશય વરસાદ અને અન્ય આત્યંતિક હવામાન ઘટનાઓની આવર્તન અને તીવ્રતામાં વધારો થવાની ધારણા છે. બીજી તરફ ભારત માટે ચિંતાજનક સમાચાર એ છે કે અલ નીનોની આ સ્થિતિના લીધે ચોમાસા પર પણ પ્રતિકુળ અસર પહોચી શકે છે.
વિશ્વ હવામાન સંગઠનના ગ્લોબલ સીઝનલ કલાઇમેટ અપડેટ રિપોર્ટ અનુસાર, જુલાઈથી સપ્ટેમ્બર દરમિયાન અલ નિનો વધુ મજબૂત થવાની ધારણા છે. સંગઠન કહે છે કે તેની અસર વૈશ્વિક હવામાન પર વ્યાપકપણે અનુભવાશે.
વિશ્વ હવામાન સંગઠનના સેક્રેટરી–જનરલ સેલેસ્ટે સાઉલોએ જણાવ્યું હતું કે અલ નિનો સ્થિતિ પહેલાથી જ વિકસિત થઈ ગઈ છે અને ઝડપથી મજબૂત થવાના સંકેતો બતાવી રહી છે. આનાથી ઘણા દેશોમાં દુષ્કાળ અને ભારે વરસાદ જેવી આત્યંતિક હવામાન ઘટનાઓ તેમજ જમીન અને સમુદ્ર બંને પર ગરમીના મોજાની તીવ્રતામાં વધારો થઈ શકે છે.અલ નિનો એ અલ નિનો સધર્ન ઓસિલેશન ચક્રનો એક તબક્કો છે. આ તબક્કામાં, મધ્ય અને પૂર્વીય ઉષ્ણકટિબંધીય પ્રશાંત મહાસાગરમાં સમુદ્ર સપાટીનું તાપમાન સામાન્ય કરતા વધારે થઈ જાય છે, જે સમગ્ર વિશ્વમાં હવામાન પેટર્નને અસર કરે છે.