એક સમયે મુંબઈના અંડરવર્લ્ડમાં દાઉદ ઇબ્રાહિમની ડી કંપનીનું નામ સાંભળતાં જ મોટા ઉદ્યોગપતિઓ, બિલ્ડરો અને ફિલ્મી હસ્તીઓમાં ફફડાટ ફેલાઈ જતો હતો. હવે મુંબઈમાં લોરેન્સ બિશ્નોઈ ગેંગની વધતી પ્રવૃત્તિઓને કારણે અપરાધની દુનિયામાં ડી કંપનીનું સ્થાન એલ કંપની લઈ રહી છે કે કેમ તે સવાલ ઊભો થયો છે. ખાસ કરીને બોલિવૂડ સાથે સંકળાયેલી હસ્તીઓને નિશાન બનાવવાની ઘટનાઓએ ફરી અંડરવર્લ્ડના જૂના દિવસોની યાદ અપાવી છે.૧૯૮૦ અને ૧૯૯૦ના દાયકામાં મુંબઈમાં સંગઠિત અપરાધનું મોટું સામ્રાજ્ય ઊભું થયું હતું. કરીમ લાલા, હાજી મસ્તાન અને વરદરાજન મુદલિયાર જેવા અપરાધીઓ બાદ દાઉદ ઇબ્રાહિમે અંડરવર્લ્ડમાં પોતાનું વર્ચસ્વ સ્થાપ્યું. દાણચોરી, ગેરકાયદે દારૂ અને જુગારથી શરૂ થયેલી અપરાધી પ્રવૃત્તિઓ ખંડણી, સોપારી આપીને હત્યા કરાવવા, જમીનો પર કબજો મેળવવા અને ફિલ્મ ઉદ્યોગમાં દખલગીરી સુધી વિસ્તરી હતી.ડી કંપનીનો પ્રભાવ એટલો વધી ગયો હતો કે કેટલાક ફિલ્મ નિર્માતાઓ અને કલાકારોએ અપરાધીઓની ધમકીઓ સામે ઝૂકવું પડતું હતું. ફિલ્મોના નિર્માણમાં નાણાં રોકવાથી માંડીને ફિલ્મના વિતરણ અને કમાણીમાંથી હિસ્સો મેળવવા સુધી અંડરવર્લ્ડની દરમિયાનગીરીની ફરિયાદો થતી હતી.૧૯૯૩ના મુંબઈ બોમ્બધડાકા બાદ પોલીસની કાર્યવાહી વધુ કડક બની હતી. દાઉદ સહિતના અપરાધીઓના નેટવર્કને મોટો ફટકો પડ્યો. સમય જતાં મુંબઈના જૂના અંડરવર્લ્ડની જાહેરમાં દેખાતી સક્રિયતા ઘટી, પરંતુ સંગઠિત અપરાધનો સંપૂર્ણ અંત આવ્યો નહીં.આ દરમિયાન પંજાબની વિદ્યાર્થી રાજનીતિમાંથી લોરેન્સ બિશ્નોઈ અને ગોલ્ડી બરાડ જેવા અપરાધીઓનો ઉદય થયો. બિશ્નોઈએ જેલમાં રહ્યા દરમિયાન પણ અન્ય અપરાધીઓ અને હથિયારના દાણચોરો સાથે સંપર્કો વિકસાવ્યા હોવાની તપાસ એજન્સીઓની માહિતી છે.તાજેતરના વર્ષોમાં સલમાન ખાનને ધમકીઓ, ફિલ્મી હસ્તીઓની સુરક્ષા સામે જોખમ અને ગોળીબારના કેસોમાં બિશ્નોઈ ગેંગનું નામ ચર્ચામાં આવ્યું છે. ફેબ્રુઆરી ૨૦૨૬માં ફિલ્મ નિર્દેશક રોહિત શેટ્ટીના જુહુસ્થિત ઘરની બહાર ગોળીબાર થયો હતો. આ કેસમાં પોલીસે બિશ્નોઈ ગેંગ સાથે સંકળાયેલા આરોપીઓ સામે આરોપનામું દાખલ કર્યું છે.૧૮ ઓક્ટોબરે અભિનેતા ટાઇગર શ્રોફની કાર ઉપર જુહુ વિસ્તારમાં ગોળીબાર થયાના અહેવાલે ફરી ખળભળાટ મચાવ્યો. આ હુમલામાં ટાઇગર શ્રોફ બચી ગયા.જોકે પોલીસના આંકડા પ્રમાણે મુંબઈમાં ૨૦૨૪માં ખંડણીના ૧૯૯ અને ૨૦૨૫માં ૩૧૪ કેસ નોંધાયા હોવા છતાં આ તમામ ગુનાઓને બિશ્નોઈ ગેંગ સાથે જોડવા યોગ્ય નથી. એલ કંપનીએ સમગ્ર મુંબઈ ઉપર ડી કંપની જેવું વર્ચસ્વ સ્થાપી દીધું હોવાનું કહેવા માટે પણ પૂરતા પુરાવા નથી.અપરાધની રીતો બદલાઈ છે. જૂના અંડરવર્લ્ડની જગ્યાએ સોશિયલ મીડિયા મારફતે ધમકીઓ, ગોળીબાર અને ગુનાની જવાબદારી સ્વીકારવાની નવી પદ્ધતિઓ સામે આવી છે.