ભારતમાં માત્ર 10 મિનિટમાં ગ્રાહકો સુધી સામાન પહોંચાડતી ક્વિક કોમર્સ કંપનીઓ જેવી કે Blinkit, સ્વિગી, ઇન્સ્ટામાર્ટ અને એમેઝોન નાઉ (Amazon Now) માટે હવે નિયમો વધુ કડક થવા જઈ રહ્યા છે. દેશમાં ખાદ્ય સુરક્ષાનું નિયમન કરતી સંસ્થા એફએસએસએઆઈ (FSSAI) ઓનલાઈન પ્લેટફોર્મ પર વેચાતા ખાદ્ય પદાર્થોની ગુણવત્તા, સલામતી અને તેની સાથે જોડાયેલી સાચી માહિતીને લઈને કડક નિયમો લાવવા પર ગંભીરતાથી વિચાર કરી રહી છે. બ્લૂમબર્ગના અહેવાલ મુજબ આ પગલાનો મુખ્ય હેતુ ગ્રાહકોને ગેરમાર્ગે દોરતા દાવાઓ અને ખાવા-પીવાની ચીજવસ્તુઓને અયોગ્ય રીતે સ્ટોર કરવાની અનિયમિતતાઓ પર કડક લગામ કસવાની છે.

એફએસએસએઆઈના સીઈઓ રાજિત પુનહાનીએ જણાવ્યું છે કે નિયમનકાર આ કંપનીઓ માટે નિયમોને વધુ મજબૂત બનાવીને તેમને સીધી જવાબદાર ઠેરવવાની દિશામાં કામ કરી રહ્યા છે. પ્રસ્તાવિત ફેરફારોની સીધી અસર ક્વિક કોમર્સ અને ઓનલાઈન કરિયાણાના કારોબાર પર પડી શકે છે. નવા નિયમો હેઠળ ઓનલાઈન પ્લેટફોર્મ પર વેચાતા ફૂડ પ્રોડક્ટ્સની લિસ્ટિંગમાં ઉત્પાદનની તારીખ (મેન્યુફેક્ચરિંગ ડેટ), એક્સપાયરી ડેટ અને બેચ નંબર જેવી મહત્વપૂર્ણ માહિતી સ્પષ્ટપણે દર્શાવવી ફરજિયાત બની શકે છે. આ ઉપરાંત, જો કોઈ કંપની પોતાના ઉત્પાદન વિશે ભ્રામક અથવા ખોટા દાવા કરે છે, તો તેના માટે પ્લેટફોર્મની જવાબદારી નક્કી કરવા પર પણ વિચાર કરવામાં આવી રહ્યો છે.

નિયમનકાર ડાર્ક કિચન (ડાર્ક કિચન) ના ફોટોગ્રાફ્સ અને સરનામાં આપવાનું પણ અનિવાર્ય બનાવી શકે છે. ડાર્ક કિચન એવા રસોડા છે જ્યાં માત્ર ખાવાનું તૈયાર કરવામાં આવે છે, પરંતુ ગ્રાહકો માટે બેસીને જમવાની સુવિધા હોતી નથી. આ સાથે જ ડાર્ક સ્ટોર્સની અચાનક તપાસ પણ વધારવામાં આવશે, જેથી તે સુનિશ્ચિત થઈ શકે કે તમામ ખાદ્ય પદાર્થો યોગ્ય તાપમાન અને સુરક્ષિત પરિસ્થિતિઓમાં સંગ્રહિત કરવામાં આવ્યા છે, જેમાં ફ્રોઝન ફૂડ્સનો પણ સમાવેશ થાય છે.

અત્રે ઉલ્લેખનીય છે કે અગાઉ પણ એફએસએસએઆઈ દ્વારા ખાદ્ય સુરક્ષાના ધોરણોનું પાલન કરાવવા માટે ઓડિટ અને તપાસ તેજ કરવામાં આવી છે. ગ્રાહકો તરફથી મળતી ફરિયાદોના આધારે અનેક મામલાઓની તપાસ કરવામાં આવી ચૂકી છે. અગાઉ Blinkit, સ્વિગી, ઇન્સ્ટામાર્ટ, ફ્લિપકાર્ટ અને એમેઝોનના ભારતીય કારોબારને પણ અલગ-અલગ અનિયમિતતાઓને લઈને નિયમનકારી કાર્યવાહીનો સામનો કરવો પડ્યો છે. આ કડકાઈ માત્ર ઓનલાઈન ડિલિવરી પપ્લેટફોર્મ પૂરતી સીમિત નથી, પરંતુ હોટેલ્સ, રેસ્ટોરન્ટ્સ અને નેસ્લે, પેપ્સીકો તથા ડાબર જેવી મોટી ખાદ્ય ઉત્પાદક કંપનીઓ પણ હવે એફએસએસએઆઈની કડક નજર હેઠળ આવી ગઈ છે.