ગુરુવારે સાંજે રાજકોટ, જેતપુર, લોધિકા સહિત રાજ્યના 11 તાલુકામાં સામાન્ય ઝાપટાંથી સવા ઈચ સુધીનો વરસાદ વરસાવ્યા પછી હવે ગુજરાતમાં માવઠું પૂરું થયું છે. બીજી બાજુ નૈઋત્યનું ચોમાસું અપેક્ષા મુજબ બંગાળની ખાડી અને અરબી સમુદ્રમાં આગળ વધી રહ્યું છે.

આગામી બે થી ત્રણ દિવસમાં જ નૈઋત્યનું ચોમાસુ છવાઈ જશે

અંદામાનમાં વરસાદ સાથે શરૂ થયેલું નૈઋત્યનું ચોમાસું અરબી સમુદ્રના દક્ષિણ ભાગમાં, માલદીવ અને કોમોરિન એરિયામાં, બંગાળની ખાડીમાં દક્ષિણ તરફના ભાગમાં આગળ વધી રહ્યું છે. આંદામાન ટાપુના બાકી રહી ગયેલા ભાગોમાં અને આંદામાનના સમુદ્રમાં તથા બંગાળની ખાડીના મધ્ય ભાગમાં આગામી બે થી ત્રણ દિવસમાં જ નૈઋત્યનું ચોમાસુ છવાઈ જશે.

દક્ષિણ ગુજરાતમાં સાયક્લોનિક સર્ક્યુલેશન છવાયું

દેશના અન્ય ભાગોની માફક દક્ષિણ ગુજરાતમાં દરિયાની સપાટીથી 5.8 કીલોમીટરની ઊંચાઈ પર સાયક્લોનિક સર્ક્યુલેશન છવાયું છે. પરંતુ તે પ્રભાવશાળી ન હોવાથી વરસાદની શક્યતા નથી. દેશના અન્ય રાજ્યોની વાત કરીએ તો ઓડિશા નાગાલેન્ડ મણીપુર મિઝોરમ આસામ અરુણાચલ મેઘાલય ત્રિપુરા આંધ્રપ્રદેશ કર્ણાટકા તામિલનાડુ પુડીચેરી કોકણ ગોવા મધ્યપ્રદેશ મહારાષ્ટ્ર અને બિહારમાં હજુ માવઠાનો વરસાદ વરસી રહ્યો છે.

ગરમીનો એક રાઉન્ડ આવશે!

એકાદ બે દિવસમાં જ માવઠાનું જોર સમગ્ર દેશમાં નહિવત થઈ જશે અને ગરમીનો એક રાઉન્ડ આવશે! ગુજરાતમાં આજથી ગરમીના પ્રમાણમાં ચાર દિવસમાં ત્રણથી ચાર ડિગ્રી જેટલો વધારો થવાની શક્યતા છે. રાજસ્થાન બિહાર પંજાબ ઉત્તર પ્રદેશ ઝારખંડ અને ઓડિશામાં હીટ વેવ માટેની ચેતવણી આપવામાં આવી છે.