અમદાવાદ શહેરના પ્રખ્યાત રાજપથ રંગોલી ક્લબ રોડ પર આવેલા 'અર્બન ચોક' નામના ફૂડ માર્કેટમાં અચાનક ભીષણ આગ ભભૂકી ઊઠવાની ઘટના સામે આવી છે. આ આગ ફૂડ બજારમાં આવેલા 3 થી 4 જેટલા ખાણીપીણીના સ્ટોલમાં ઝડપથી ફેલાઈ ગઈ હતી.

મળેલી પ્રાથમિક માહિતી અનુસાર, એક ફૂડ આઉટલેટમાં અચાનક લાગેલી આ આગ જોતજોતામાં બાજુમાં આવેલા મોમોસના આઉટલેટ સુધી ફેલાઈ ગઈ હતી. આગના કારણે સમગ્ર વિસ્તારમાં અફરાતફરીનો માહોલ સર્જાયો હતો અને ધુમાડાના ગોટેગોટા ઉડતા નજરે પડ્યા હતા.

બનાવની જાણ થતાં જ ફાયર બ્રિગેડની ટીમ ત્વરિત એક્શનમાં આવી ગઈ હતી અને 4 જેટલા ફાયર ટેન્ડર તાત્કાલિક ઘટનાસ્થળે દોડી ગયા હતા. ફાયર ફાઈટરોએ સ્થળ પર પહોંચીને પાણીનો મારો ચલાવી આગ પર કાબૂ મેળવવાની કામગીરી પૂર્ણ ઝડપથી હાથ ધરી હતી.

પ્રાથમિક વિગતો મુજબ સદનસીબે આ ઘટનામાં કોઈ જાનહાનિ થઈ નથી, પરંતુ ખાણીપીણીના સ્ટોલ બળીને ખાખ થઈ જતાં મોટા પાયે આર્થિક નુકસાન થયું હોવાની આશંકા વ્યક્ત કરવામાં આવી રહી છે.