રાજકોટ મહાપાલિકાની ફાયર એન્ડ ઇમરજન્સી સર્વિસીઝ દ્વારા રાજકોટ શહેર વિસ્તારમાં આવેલ હાઇરાઇઝ બિલ્ડીંગમાં લગાવવામાં આવતી ફાયર સેફટીના સાધનો જે બિલ્ડીંગમાં રહેતા લોકોની જાગૃતિ અર્થે ગઇકાલે શાલિગ્રામ હાઈટ્સ, જુનો મોરબી રોડ, રાજકોટ ખાતે ફાયર સેફટીની મોકડ્રીલનું આયોજન કરવામા આવ્યુ હતું, જેમાં અંદાજે ૧૦૦ જેટલા રહીશો જોડાયા હતા.

ફાયર સેફટીની મોકડ્રીલ દ્વારા બિલ્ડીંગમાં લગાવવામાં આવેલ ફાયર સીસ્ટમ અને ફાયર સેફટીના સાધનોને આગ લાગે ત્યારે કઇ રીતે ઉપયોગ કરવો, શું કરવું અને શું ન કરવું જોઇએ તેમજ આગ બુઝાવવા માટેની ફાયર સીસ્ટમ અને સાધનો તથા ફાયર એક્ષ્સ્ટીંગ્યુસરનો ઉપયોગ કેવી રીતે કરવો, જાળવણી અને કઇ રીતે પોતાનો તથા અન્યનો બચાવ કરવો તે અંગે ફાયર એન્ડ ઈમરજન્સી વિભાગના સ્ટેશન ઓફીસર રહીમભાઈ જોબન, ફાયર ઓપરેટર પરેશભાઈ રાઠોડ, ફાયર ઓપરેટર ધનરાજ મેટાલીયા, ડ્રાઈવર મહિપાલસિંહ સહિતના સ્ટાફ દ્વારા માહિતગાર કરવામાં આવ્યા હતા.

આ બાબતે વધુ ને વધુ લોકો ભાગીદાર થાય અને ફાયર સેફટીની તાલીમ મેળવે તેવો જાહેર જનતાને અનુરોધ કરવામા આવે છે. જે બિલ્ડીંગ ધારકો પોતાની બિલ્ડીંગમાં મોકડ્રીલ આયોજન કરવા માટે સ્વેચ્છીક અરજી કરશે તેમને પહેલી તક આપવામાં આવશે તેમ ઈનચાર્જ ચીફ ફાયર ઓફિસરે જણાવ્યું હતું.