ગીર સોમનાથ જિલ્લાના ઉના નજીક આવેલા નવાબંદરના દરિયામાંથી એક ચિંતાજનક પરંતુ રાહત આપતા સમાચાર સામે આવ્યા છે. અરબી સમુદ્રમાં કરંટ વધવાના કારણે નવાબંદરના દરિયામાં કિનારાથી અંદાજે 10 નોટિકલ માઇલ દૂર એક ફિશિંગ બોટે અચાનક દરિયામાં જળસમાધિ લઈ લીધી હતી. આ અકસ્માત સર્જાતાં જ બોટ પર સવાર ખલાસીઓમાં ભારે અફરાતફરી મચી ગઈ હતી. જોકે, સદનસીબે નજીકમાં જ હાજર અન્ય બોટના ખલાસીઓએ સમયસૂચકતા દાખવીને બોટ પર સવાર તમામ 6 ખલાસીઓને સુરક્ષિત રીતે બચાવી લીધા હતા.

મળતી વિગતો અનુસાર, આ દુર્ઘટનાનો ભોગ બનેલી ફિશિંગ બોટ સ્થાનિક બોટ માલિક ઇસુબ મોહમ્મદની હોવાનું જાણવા મળ્યું છે. દરિયામાં હવામાન બદલાતા અને પ્રચંડ કરંટ ઉત્પન્ન થતાં પાણીના ભારે પ્રવાહ સામે બોટ પોતાનું સંતુલન ગુમાવી બેઠી હતી અને ધીમે-ધીમે દરિયાના ઊંડા પાણીમાં ગરકાવ થવા લાગી હતી. બોટમાં પાણી ભરાવાનું શરૂ થતાં જ બોટ પરના ખલાસીઓએ મદદ માટે બૂમાબૂમ કરી મૂકી હતી.

ઘટના સમયે નજીકના દરિયાઈ વિસ્તારમાં માછીમારી કરી રહેલી અન્ય બોટના ખલાસીઓનું ધ્યાન આ ડૂબતી બોટ તરફ ગયું હતું. તેમણે ક્ષણનો પણ વિલંબ કર્યા વગર પોતાની બોટ ડૂબતી બોટ તરફ હંકારી મૂકી હતી અને બચાવ કામગીરી હાથ ધરી હતી. અન્ય ખલાસીઓની ત્વરિત મદદના કારણે ડૂબતી બોટમાં ફસાયેલા તમામ 6 ખલાસીઓને એક પછી એક સફળતાપૂર્વક બહાર કાઢી લેવામાં આવ્યા હતા. આ ઘટનામાં તમામ ખલાસીઓનો આબાદ બચાવ થતાં સ્થાનિક માછીમાર સમુદાયે રાહતનો શ્વાસ લીધો છે.

દરમિયાન દરિયામાં બોટ ડૂબવાની આ સમગ્ર ઘટનાનો એક લાઈવ વીડિયો પણ સામે આવ્યો છે, જે સોશિયલ મીડિયા પર વાયરલ થઈ રહ્યો છે. વીડિયોમાં જોઈ શકાય છે કે કેવી રીતે ઉછળતા મોજાઓની વચ્ચે મજબૂત બોટ જોતજોતામાં સમુદ્રના પાણીમાં સમાઈ જાય છે. બોટ માલિકને આ અકસ્માતમાં મોટું આર્થિક નુકસાન થયું હોવાનો અંદાજ છે. વન વિભાગ અને કોસ્ટ ગાર્ડ દ્વારા દરિયામાં જતાં માછીમારોને હવામાનની આગાહી ધ્યાને રાખીને સાવચેતીપૂર્વક માછીમારી કરવા અપીલ કરવામાં આવી છે.