કર્ણાટક ફૂડ સેફ્ટી એન્ડ ડ્રગ્સ એડમિનિસ્ટ્રેશને ઝેરી ધતુરાના ફળ અને બીજના ઓનલાઈન વેચાણના સંદર્ભમાં મોટી કાર્યવાહી કરી છે. જેમાં એમેઝોન, સ્વિગી ઇન્સ્ટામાર્ટ અને બિગબાસ્કેટને જારી કરાયેલા ફૂડ લાઇસન્સ આગામી સૂચના સુધી સ્થગિત કરવાનો આદેશ આપ્યો છે. તપાસમાં બહાર આવ્યું છે કે ધતુરા ફળ અને બીજ માનવ વપરાશ માટે ઓનલાઈન વેચાઈ રહ્યા હતા.તપાસ દરમિયાન, સત્તાવાળાઓને જાણવા મળ્યું કે ધતુરા ફળ અને બીજ કેટલાક ઓનલાઈન પ્લેટફોર્મ પર વેચાઈ રહ્યા હતા. આમાંથી કેટલાક પેકેજો પર એફએસએસએઆઈ લાઇસન્સ અથવા નોંધણી નંબર પણ હતા. વિભાગે આને ગંભીર બાબત ગણાવી કહ્યું કે ધતુરા ઝેરી છે અને તેનું સેવન જાહેર આરોગ્ય માટે ગંભીર ખતરો ઉભો કરી શકે છે.ઓથોરિટીએ એમેઝોન, સ્વિગી ઇન્સ્ટામાર્ટ અને બિગબાસ્કેટને માનવ વપરાશ માટે ધતુરાના વેચાણ સંબંધિત તમામ ઓનલાઈન લિસ્ટિંગ અને જાહેરાતોને તાત્કાલિક દૂર કરવા અને ખાદ્ય પદાર્થ તરીકે તેના વેચાણ, વિતરણ અથવા પ્રદર્શન પર પ્રતિબંધ મૂકવાનો નિર્દેશ આપ્યો છે.વિભાગના જણાવ્યા અનુસાર, એમેઝોને આ બાબતે કોઈ જવાબ આપ્યો ન હતો. સ્વિગી ઇન્સ્ટામાર્ટે જરૂરી દસ્તાવેજો સબમિટ કરવા માટે વધારાનો સમય માંગ્યો હતો. દરમિયાન, બિગબાસ્કેટે ઓથોરિટીને જાણ કરી હતી કે ધતુરાના ઉત્પાદનોનું વેચાણ બંધ કરવામાં આવ્યું છે. કંપનીએ એમ પણ જણાવ્યું હતું કે ભવિષ્યના કોઈપણ લિસ્ટમાં સ્પષ્ટપણે માનવ વપરાશ માટે નહીં લખેલું હશે.કર્ણાટક ફૂડ સેફ્ટી એન્ડ ડ્રગ્સ એડમિનિસ્ટ્રેશને આ પ્લેટફોર્મ્સને ધતુરા સંબંધિત ઉત્પાદનો સપ્લાય કરતા વિક્રેતાઓ અને કંપનીઓના લાઇસન્સ અથવા નોંધણી સામે કાર્યવાહી કરવાનો નિર્દેશ પણ આપ્યો છે. વિભાગે તમામ સંબંધિત પક્ષો પાસેથી પાલન અહેવાલો માંગ્યા છે અને ચેતવણી આપી છે કે જો ઉલ્લંઘન જોવા મળશે તો કડક કાર્યવાહી કરવામાં આવશે.