કોટડા સાંગાણી જૂથ સેવા સહકારી મંડળીમાં છેલ્લા 25 વર્ષથી પ્રમુખ તરીકેની જવાબદારી સંભાળતા પૂર્વ ધારાસભ્ય અને એનસીપીના પ્રદેશ પ્રમુખ ચંદુભાઈ વઘાસીયાની પેનલને ચૂંટણીમાં પરાજય મળ્યો છે અને ભાજપ પ્રેરિત કિસાન વિકાસ પેનલનો વિજય થયો છે.
કોટડાની જૂથ સેવા સહકારી મંડળી છેલ્લા 68 વર્ષથી કાર્યરત છે અને તેના ઇતિહાસમાં પ્રથમ વખત ચૂંટણી યોજવામાં આવી હતી. આ ચૂંટણીમાં છેલ્લા 25 વર્ષથી પ્રમુખ તરીકેની જવાબદારી સંભાળતા પૂર્વ ધારાસભ્ય ચંદુભાઈ વઘાસીયા અને તેની પેનલનો કારમો પરાજય થયો છે. જયારે રાજકોટ જિલ્લા ભાજપ્ના અગ્રણી બાબુભાઈ સાવલિયાના નેતૃત્વમાં રચાયેલી કિસાન વિકાસ પેનલના તમામ 15 ઉમેદવારો 200 જેટલા મતની જંગી લીડથી વિજેતા બન્યા છે.
આ ચૂંટણીમાં સહકારિ ક્ષેત્રના દિગ્ગજ નેતા જયેશભાઈ રાદડિયા રાજકોટ જિલ્લા પંચાયતના સભ્ય અર્જુનભાઈ ખાટરીયા ધર્મેશભાઈ ટીલાળા સહકારી મંડળીના પ્રમુખ એન.ડી.જાડેજા વાડિયાના યુવરાજસિંહ જાડેજા દૂધ સહકારી મંડળીના પ્રમુખ સુરેશ લુણાગરિયા કોટડા સાંગાણી તાલુકા પંચાયતના પ્રમુખ ધર્મેન્દ્રસિંહ જાડેજા એડવોકેટ મહીરાજસિંહ જાડેજા અશોકભાઈ ઠુંમર રાજુભાઈ સાવલિયા મહેન્દ્રસિંહ જાડેજા હરેશભાઈ ભૂત પ્રવીણભાઈ ભૂત મનોજભાઈ દાફડા ધર્મેશભાઈ સોરઠીયા વગેરેએ જહેમત ઉઠાવી હતી અને પરિણામ જાહેર થયા પછી ચૂંટાયેલા સભ્યોનું સન્માન કરવામાં આવ્યું હતું.
નવી બોડીમાં પ્રમુખ તરીકેની જવાબદારી રાજુભાઈ ધીરુભાઈ ભુતે અને ઉપપ્રમુખ તરીકે અનિરુદ્ધસિંહ જાડેજાએ સંભાળી છે. ચૂંટણી દરમિયાન કાયદો વ્યવસ્થાની પરિસ્થિતિ જળવાઈ રહે તે માટે કોટડા સાંગાણી પોલીસ સબ ઇન્સ્પેક્ટર જાડેજા પોલીસ સ્ટાફ અને હોમગાર્ડ ના જવાનોને બંદોબસ્તમાં મૂકવામાં આવ્યા હતા. કોટડા સાંગાણી માણેકવાડા પાંચ તલાવડા નવી ખોખરી અને જૂની ખોખરી ગામના મતદારોએ મતદાનની પ્રક્રિયામાં ઉત્સાહભેર ભાગ લીધો હતો.