સુરતના સચિન વિસ્તારમાં આવેલા ગભેણી ચોકડી નજીક આજે સવારે એક અત્યંત ભયાનક અગ્નિકાંડની ઘટના સામે આવી હતી. બસેરા નગર પાસે ખુલ્લા પ્લોટમાં સ્થિત બે દુકાનોમાં અચાનક ભીષણ આગ ભભૂકી ઊઠતાં સમગ્ર વિસ્તારમાં અફરાતફરી મચી ગઈ હતી. આગની તીવ્રતા એટલી વધારે હતી કે દૂર-દૂર સુધી તેના કાળા ધુમાડાના ગોટેગોટા જોવા મળતા આસપાસના રહીશોમાં ભારે ફાળ પડી હતી. ગેરેજ અને તેની બાજુમાં આવેલી અન્ય એક દુકાનમાં રાખેલા વેસ્ટ ઓઇલના બે ડ્રમ આગની ચપેટમાં આવી જતાં પ્રચંડ ધડાકા સાથે બ્લાસ્ટ થયો હતો. આ ધડાકો એટલો શક્તિશાળી હતો કે દુકાનની છત પર લગાવેલા લોખંડના પતરાં હવામાં ઊછળીને દૂર ફેંકાયા હતા. 

આ ધડાકાના અવાજથી આજુબાજુના લોકો અને રસ્તા પરથી પસાર થતા રાહદારીઓમાં ભારે ગભરાટ ફેલાઈ ગયો હતો અને લોકો જીવ બચાવવા ભાગદોડ કરવા લાગ્યા હતા. આગ ગણતરીની મિનિટોમાં જ આસપાસના વિસ્તારમાં ફેલાઈ ગઈ હતી, જેના લીધે દુકાનની બહાર પાર્ક કરેલા વાહનો પણ તેની લપેટમાં આવી ગયાં હતાં. ઘટનાસ્થળે ઊભેલા ત્રણ આઇશર ટ્રક અને એક છોટા હાથી ટેમ્પો ક્ષણભરમાં જ બળીને ખાખ થઈ ગયા હતા. વાહનોની સાથે દુકાનની અંદર રાખવામાં આવેલો તમામ કિંમતી સામાન અને સામગ્રી પણ સંપૂર્ણપણે સળગીને રાખ થઈ ગઈ હતી.

ઘટના અંગે ફાયર ઓફિસરે જણાવ્યું હતું કે, કંટ્રોલ રૂમમાં મેસેજ મળતાં જ સુરત મહાનગરપાલિકાના અલગ-અલગ સાત ફાયર સ્ટેશનોમાંથી નવ ફાયર ફાઈટરો ઘટનાસ્થળે મોકલવામાં આવ્યા હતા. ફાયર ફાઈટરોએ ચારેય તરફથી પાણીનો સતત મારો ચલાવીને આસપાસ આવેલા અન્ય મોટા ગોડાઉનો સુધી આગ ફેલાતી અટકાવી હતી. આશરે એક કલાકથી વધુ સમયની કડક જહેમત બાદ આગ પર સંપૂર્ણ કાબૂ મેળવવામાં સફળતા મળી હતી.

આ ભયાનક દુર્ઘટનામાં સૌથી આશ્વાસનજનક વાત એ રહી છે કે સદનસીબે કોઈ જાનહાનિ કે માનવ ઈજા થઈ નથી. પ્રાથમિક તપાસમાં આગ લાગવાનું કારણ શોર્ટ સર્કિટ હોવાનું અનુમાન કરવામાં આવી રહ્યું છે. હાલમાં ફાયર વિભાગ અને સ્થાનિક પોલીસ દ્વારા ઘટનાના ચોક્કસ કારણો જાણવા તેમજ આ દુર્ઘટનામાં થયેલા કુલ આર્થિક નુકસાનની આંકડાકીય વિગતો મેળવવા માટે વધુ તપાસ હાથ ધરવામાં આવી છે.