અમદાવાદનું સરદાર વલ્લભભાઈ પટેલ ઈન્ટરનેશનલ એરપોર્ટ ફરી એકવાર ડ્રગ્સ માફિયાઓના મનસૂબાને નિષ્ફળ બનાવવાનું કેન્દ્ર બન્યું છે. એરપોર્ટ પર સુરક્ષા એજન્સીઓની સતર્કતાના કારણે કરોડો રૂપિયાનો નશીલો પદાર્થ ગુજરાતની ધરતી પર ઉતરે તે પહેલાં જ ઝડપી લેવામાં આવ્યો છે.

અમદાવાદ આંતરરાષ્ટ્રીય એરપોર્ટ પરથી કસ્ટમ વિભાગે બાતમીના આધારે ફ્લાઇટમાં આવેલા એક શખ્સને કરોડો રૂપિયાના નશીલા પદાર્થ સાથે ઝડપી લીધો છે. કસ્ટમ્સની ટીમે એરપોર્ટ પરથી આશરે રૂપિયા ૫ કરોડની કિંમતનો આયાતી (ઈન્ટરનેશનલ) ગાંજો જપ્ત કર્યો છે. આ પ્રતિબંધિત ડ્રગ્સની ગેરકાયદેસર હેરાફેરી કરવાના ગુનામાં કસ્ટમ વિભાગે એક આરોપીની ધરપકડ કરી આગળની સઘન પૂછપરછ હાથ ધરી છે.

બેગના ગુપ્ત ખાનામાં રાખ્યા હતા કાળા પેકેટો
મળતી માહિતી અનુસાર એરપોર્ટ પર ઉતરેલા એક મુસાફરની હિલચાલ શંકાસ્પદ જણાતાં કસ્ટમ વિભાગના અધિકારીઓએ તેને તપાસ માટે અટકાવ્યો હતો. જ્યારે કસ્ટમ્સની ટીમે તેની બેગની બારીકાઈથી તલાશી લીધી ત્યારે તેમાંથી કાળા રંગના ખાસ પેકેટો (Black Packets) મળી આવ્યા હતા. આ બ્લેક પેકેટો ખોલીને જોતાં તેમાંથી ઉચ્ચ ગુણવત્તાનો આયાતી ગાંજો મળી આવ્યો હતો, જેની આંતરરાષ્ટ્રીય બજારમાં કિંમત અંદાજે ₹૫ કરોડ જેટલી આંકવામાં આવી રહી છે.