રાજકોટ મહાપાલિકાના ઇસ્ટ ઝોન હેઠળના વોર્ડ નં.૪માં કુવાડવા રોડ ઉપર ડી માર્ટ પાછળ આવેલા ૫૦ ફૂટના રોડ ઉપર ખાડાઓ વચ્ચે ડામર રોડ શોધવો પડે તેવી ભયાનક સ્થિતિ હોય તેમજ સાત સાત વર્ષથી અહીં ડામર રોડ બન્યો ન હોય તેમજ ખાડાનું પેચવર્ક કરવા પણ કોઇ આવતું ન હોય આજે સેન્ટ્રલ ઝોન ઓફિસ ખાતે મેયર નયનાબેન પેઢડિયાને આ અંગેની રજૂઆત કરવા લતાવાસીઓનું ટોળું ધસી આવ્યું હતું.

વિશેષમાં મેયરને રજુઆત કરવા ધસી આવેલા લતાવાસીઓએ આક્રોશભેર જણાવ્યું હતું કે ઉપરોક્ત રોડ ઉપર શ્રી બંગલો સોસાયટી છે જેમાં ૧૪૧ મકાન છે. સાત વર્ષથી મેઈન રોડ ઉપર પણ ડામર થયો નથી. પેચ વર્ક પણ થતું નથી. આથી વોર્ડ ઓફિસે અવાર નવાર રજૂઆત કરી હતી પરંતુ કોઈ જ પરિણામ નહીં આવતા અંતે આજે રહેવાસીઓ મેયરને રજુઆત કરવા આવ્યા હતા. આ સમગ્ર વિસ્તારમાં છેલ્લા એક સપ્તાહથી ડહોળું પાણી આવતું હોવાની પણ લતાવાસીઓએ રજૂઆત કરી હતી. દરમિયાન મેયરે રજૂઆત સાંભળી તાત્કાલિક યોગ્ય કાર્યવાહી કરવા અધિકારીઓ અને ઇજનેરોને આદેશ કર્યો હતો.