બનાવ અંગે રાજકોટમાં ધંટેશ્વર ગામમાં રહેતાં લાભુભાઈ નરસંગભાઈ હુંબલ (ઉ.વ.૭૧) એ ગાંધીગ્રામ પોલીસ મથકમાં આ ઘટના અંગે એક અજાણ્યા પુરૂષ અને સ્ત્રી સામે ફરિયાદ નોંધાવી છે. ફરીયાદીએ જણાવ્યું હતું કે, તેઓને રાજકોટ - જામનગર હાઈવે પર ગુજરાત ગેસ પંપની પાસે રીયલ પર્લ ફાર્મ નામનો પાર્ટી પ્લોટ આવેલ છે. આ પાર્ટી પ્લોટ ખોડાભાઈ લાલજીભાઈ પટેલને ભાડે આપેલ છે. જે પાર્ટી પ્લોટ ખાતે તેઓ દરરોજ બેસવા જાય છે.

ગઈકાલે સવારના પોણા અગિયારેક વાગ્યાની આસપાસ તેઓ ઘરે હતાં ત્યારે એક અજાણ્યા વ્યક્તિનો ફોન આવેલ અને વાત કરેલ કે, રીયલ પર્લ ફાર્મ ભાડે લગ્ન માટે જોઈએ છે. બાદ અલગ- અલગ સમયે ત્રણેક ફોન આવેલ હતા. ફરીયાદી સાંજના ચારેક વાગ્યાની આસપાસ જામનગર રોડ ગુજરાત ગેસ પંપની બાજુમા આવેલ પાર્ટી પ્લોટ ખાતે હતાં ત્યારે તેમને ફોન કરનાર વ્યકતિ એક સફેદ કલરની કાર લઈને આવેલા જેમા અજાણ્યા પુરુષ અને તેની સાથે એક સ્ત્રી હતી.

જે બંને ફાર્મમાં આવ્યા બાદ તેઓની સાથે પ્લોટ ભાડે રાખવાની વાત કરી હતી અને બાદમાં તેઓને ફાર્મમાં આવેલ રૂમો જોવા ગયેલા અને આ દરમિયાન ત્યાંના પગી ભરતભાઈ વાધેલાએ રૂમના લોક ખોલી આપેલા બાદ પગી ભરતભાઈ વાધેલા તેના કામ ઉપર જતો રહેલ હતાં. તેઓએ પાર્ટી પ્લોટ દેખાડેલ બાદ ઓફીસમા ગયેલા આ દરમ્યાન ઓફીસમા બેસી એકબીજા સાથે વાત-ચીત કરતા હતા.આ સમયે અજાણ્યો પુરુષ અચાનક ઉભો થઈ તેના પેન્ટના નેફામાંથી છરી કાઢી અને છરી બતાવી મોઢા આડો હાથ રાખી મુંગો દીધો હતો તેની સાથેની અજાણી સ્ત્રીએ તેઓએ ગળામા પહેરેલ ચાર તોલાની રૂ.૪ લાખની સોનાના પારાવાળી માળા લુંટી આ બંને નાસી ગયા હતાં.

બનાવ અંગેની ફરીયાદ પરથી ગાંધીગ્રામ પોલીસે ગુનો નોંધી પીઆઇ એસ.આર.મેઘાણી અને તપાસ હાથ ધરી હતી. બનાવની ગંભીરતા દાખવી ડીસીપી ઝોન-૨ રાકેશ દેસાઈની સૂચનાથી એલસીબી ઝોન-૨ પીએસઆઈ આર.એચ. ઝાલા અને ટીમે પણ તપાસ હાથ ધરી લૂંટ ચલાવનાર બંટી-બબલીને પકડી પાડી મુદ્દામાલ કબજે કરવા તજવીજ હાથ ધરી હતી. તેમજ પૂર્વ આયોજિત કાવતરામાં અન્ય શખસો પણ સાથે હોવાની શંકાએ તપાસ હાથ ધરી છે.