અમેરિકા અને ઈરાન વચ્ચે તણાવ ઓછો થયા બાદ ભારતના અર્થતત્રં અંગે પોઝીટીવ સમાચાર સામે આવ્યા છે. ગ્લોબલ ઇન્વેસ્ટમેન્ટ બેંક ગોલ્ડમેન સેશે ૨૦૨૬–૨૭ નાણાકીય વર્ષ માટે ભારત માટે જીડીપી વૃદ્ધિનો અંદાજ વધારીને ૬.૫ ટકા કર્યેા છે, જે તેના અગાઉના અંદાજ ૬.૧ ટકા હતો. બેંક જણાવે છે કે પશ્ચિમ એશિયામાં પરિસ્થિતિ સામાન્ય થવાથી અને ક્રૂડ ઓઇલના ભાવમાં ઘટાડો થવાથી ભારતીય અર્થતંત્રને રાહત મળશે.
યુએસ–ઈરાન ડીલ પછી સુધારેલ મેક્રો આઉટલુક' શીર્ષકવાળા ગોલ્ડમેન સેશ રિપોર્ટ અનુસાર, યુએસ–ઈરાન કરાર બાદ વૈશ્વિક તેલ બજાર પર દબાણ ઓછું થયું છે. અગાઉ, ઇઝરાયલ, યુએસ અને ઈરાન વચ્ચેના સંઘર્ષે હોર્મુઝ સ્ટ્રેટમાં પુરવઠામાં વિક્ષેપ પડવાની આશંકા વ્યકત કરી હતી, જેના કારણે ક્રૂડ ઓઇલના ભાવમાં વધારો થયો હતો.
ભારત તેની ઉર્જા જરિયાતોનો નોંધપાત્ર હિસ્સો આયાત કરે છે, તેની ઉર્જા આયાતનો ૬૦ ટકાથી વધુ હોર્મુઝ સ્ટ્રેટમાંથી પસાર થાય છે. પરિણામે, તેલના ભાવમાં ઘટાડો દેશ માટે મોટી રાહત તરીકે જોવામાં આવે છે.
રિપોર્ટમાં નોંધવામાં આવ્યું છે કે ક્રૂડ ઓઇલ અને યુરિયા જેવી ચીજવસ્તુઓના ભાવમાં ઘટાડો ફુગાવાના દબાણને પણ ઘટાડશે. પરિણામે, ગોલ્ડમેન સેશે ભારત માટે રિટેલ ફુગાવાનો અંદાજ ૫.૧ ટકાથી ઘટાડીને ૪.૯ ટકા કર્યેા છે.
બેંક માને છે કે વૈશ્વિક સ્તરે યુરિયાના ભાવમાં ઘટાડો સરકારના ખાતર સબસિડી પરના ખર્ચમાં ઘટાડો કરી શકે છે. આનાથી સરકારનો નાણાકીય બોજ હળવો થશે અને મજબૂત રાજકોષીય સ્થિતિ જાળવવામાં મદદ મળશે.જોકે, રિપોર્ટમાં ચેતવણી પણ આપવામાં આવી છે કે હવામાન સંબંધિત અનિશ્ચિતતાઓ અને ભારત હવામાન વિભાગ દ્રારા ગરમીના મોજાની આગાહી નજીકના ગાળામાં ગ્રામીણ વિસ્તારોમાં વપરાશને અસર કરી શકે છે. તેમ છતાં, ત્રીજા ત્રિમાસિક ગાળા પછી માંગમાં સુધારો થવાની અપેક્ષા છે, કારણ કે નજીકના ભવિષ્યમાં પેટ્રોલ અને ડીઝલના ભાવમાં નોંધપાત્ર વધારો થવાની કોઈ શકયતા નથી.
ગોલ્ડમેન માને છે કે રિઝર્વ બેંક ઓફ ઇન્ડિયા (આરબીઆઈ) ૨૦૨૬ માં બે તબક્કામાં કુલ ૫૦ બેસિસ પોઇન્ટનો વ્યાજ દર વધારી શકે છે. જો કે, જો પેટ્રોકેમિકલ્સ અને અન્ય ઔધોગિક કાચા માલના ભાવમાં ઘટાડો ચાલુ રહે અને ફુગાવા પર તેની અસર મર્યાદિત રહે, તો આરબીઆઈ વ્યાજ દરો વધારવાના નિર્ણયને મુલતવી રાખી શકે છે.